Zanin zanlaiah Champions League last 16 play-off second leg khelh a ni dawn a, nialai zanah khelh zawh a ni ang. Play-off second leg hi Italian club tan fiahna hautak a ni bik zual dawn.
Italian club pathum; Inter Milan, Juventus leh Atalanta ten play-off an khel a, an pathum hian first leg-ah an tlawm vek. Last 16 lut thei turin second leg-ah inlehthalna lian thlentir vek an mamawh a, chu chu an tan a hautak bikna tur chu a ni. Fiahna hautak paltlang zo hlawm tak ang maw?
Season liam taa champions league finalist Inter Milan chuan Bodo/Glimt an hmachhawn a, mikhual an nihna hmunah 3-1 in an tlawm. Inter Milan hian zanin zanlaiah Bodo/Glimt hi San Siro-ah an mikhual dawn a. Last 16 lut thei tur chuan hun pangngaiah 2-0 tala chak, extratime-a chak emaw penalty-a chak emaw an mamawh zui dawn. An mualah chak ngei tumin \an an khawh nasa viau dawn a. Serie A table-a hmahruai mektu hi Bodko/Glimt hneh lova an tlawm a nih chuan Serie A tan pawh mualphona a tling hial thei dawn. Heti a nih vang hian Inter Milan hian an mualah chak an mamawh tak zet.
Inter Milan rual hian Serie A club lian Juventus pawh mikhual an nihna hmunah Galatasaray chu 5-2 ngawtin an hneh lo ve bawk. Mikhual an nihna hmuna si thum ngawt an phurh hi an mualah sut zawh a, hnehna chan let ngei an tum dawn a. Galatasaray in an hmahruaina humhimin last 16 luh ngei an tum ve dawn bawk a, inkhel hmuhnawm tak a nih ngei a rinawm.
Serie A club dang Atalanta pawhin an si hnih phur chungin German club lian Borussia Dortmund an mikhual ve dawn bawk. Atalanta hian an mualah 2-0 tala chak an mamawh dawn a, German club lakah hna hautak an thawh a ngai dawn. Last 16 play-off hi Italian club tan fiahna hautak a tling tak zet.
Thawhleh zana inkhel tur zingah PSG leh Real Madrid an langsar.