Aizawl : Agriculture & Farmers’ Welfare department changtu minister PC Vanlalruata’n, sorkar support price tel lo a sawhthing kg. khat Rs. 50 aia to a hralh theih chu an thil tum a ni tih house a hrilh.
Nilainia Assembly budget session zawhna leh chhanna hunah member te zawhna chhangin PC Vanlalruata chuan, Mizoram hmun hrang hrangah sawhthing Secondary Collection Centre (SCC) 64 a awm tih a sawi a, chung zinga Cherhlun, Khuangleng, W Phaileng leh Tuipang SCC ah te sawhthing lei mek a nih thu a sawi.
Minister chuan nikum lam a sorkarin direct purchase a sawhthing a lei ang chu kuminah sorkarin a tlin tawh lo tih sawiin, price support kaltlangin February ni 2, 2026 atanga sawhthing lei tan turin ruahmanna an siam thu a sawi bawk.
PC Vanlalruata chuan sorkarin sawhthing kg. ah floor price Rs. 40-45 a siam a, buyer lamin Rs. 32-33 ten an dawn a. Buyer te an tan tlat avangin Rs. 30-35 ah tihhniam leh a ni. Hemi hnu hian buyer ten Rs. 27 ten an dawn leh tih sawiin, “Kan buyer te hi an fing khawp a, an tangrual tlat thin a, chu chuan sorkarah harsatna min siam nasa hle,” a ti.
Agriculture & Farmers’ Welfare minister chuan, Mizoram a thar chhuah sawhthing quality tha tak chu man tlawm taka hralh an remti lo va, an phal vak lo tih sawiin, chu chu farmer lam te an zirtir mek thu leh tlawm te te a hralh lo remti lo turin farmer te pawh an duh thu a sawi.