Mizoram Assembly Budget Session neih mekah sawhthing lei chungchang House-ah member-te’n chai lehin an inhnial.
Nilainia Assembly Session-ah INC member C Ngunlianchunga’n Chief Minister leh Minister te’n February ni 2, 2026 atanga sawhthing lei tura an puan tawh chu tunah hian lei a ni tawh em, tia a zawh belhnaah, Agricultute & Farmers Welfare Minister PC Vanlalruata’n, Secondary Collection Centre (SCC) 64 neih mekah hmun li-ah support price pein sawhthing lei tan a nih tawh thu a sawi.
C Ngunlianchunga rawn ding chhuak lehin, sorkar hotuten an lo puan tawh avangin farmer ten an lo cho lawk vek tawh si a, Mizoram puma lei lova SCC pali chauha sawhthing lei a la nih chhan te zawt lehin, Minister PC Vanlalruata chuan, “Lei dawn tih kha dawn ang a la ni zel,” tiin a chhang a. C Ngunlianchunga rawn ding chhuak lehin, “Lei tan dawn tia chief minister meuhin a sawi tawh chu thu a ni. Minister pawhin a sawi tawh a, kan lo hre chiang lo va, pawisa pawh kan la pe hleinem tihte chu kawngbo a ni a, minister tawngkam atanga chhuak tur a ni lo,” tiin a rawn hnial leh a ni.
Agriculture & Farmers Minister chuan, sorkarin farmer-te a ngaihpawimawh avangin hlawk zawka sawhthing an hralh a duhsak tih a sawi a. Mizoram sawhthing thar te chu organic tluka a that bik avangin man man taka an hralh theih nan hma lak mek a ni a, sawhthing leitu sumdawng lian te dawr mek tih a sawi.
Minister chuan sawhthing leiah hian eng lai pawhin third party te an inrawlh thu sawiin, tunah hian Burma lam atangin sawhthing a lo lut leh meka hriat a ni a, venpui turin Home department an ngen hial thu a sawi bawk.