Aizawl : Aizawl khawpui Bypass-na tur Sihhmui atanga Muallungthu panna kawng laih mekin Tlawng lui a tibawlhhlawh nia sawi chu Thawhlehni khan Aizawl Bawrhsap leh District Disaster Management Authority Chairman ni bawk Er. Lalhriatpuia hmalakna leh kaihruainain department hrang hrang aiawh ‘Joint Mitigation Team’ ten a hmunah kalin an enfiah a. Mihring kal theih lohna pawh Drone hmanga enin a thla an la bawk.
An enfiahnaah hian Muallungthu bula Tuisik lui leh Mauphir lui te chu nikum fur lai khan kawnglaihna vung hian a chhilh nual tawh tih an finfiah a. Mauphir lui hian Tuisik lui finin, chu chuan Tlawng lui a fin leh a. Hetiang a nih takah chuan engtia thui nge leivungin a chhilh tih hre turin kea luidung zawhthlain Mauphir luia leivung hian Tuisik lui a la thleng lo tih a hmunah an enfiah a ni. Tuisik luia leivung pawh hian hm 2 chuangin Tlawng lui a la thlen loh bakah leivung emaw chhirh hnuhma an hmu lo bawk.
Hetiang hi ni mah se, furpui lo thleng turin Tlawng luia leivung a lenthlak loh nan a danna tur ruahmanna tlangpui a hmunah an sawi ho nghal a. Ruahmanna kimchang zawk siam turin a tul anga Drone Survey nei a, thutkhawm leh nise tiin ruahmanna an siam.
Serlui leh Setlak lui lam pawh hmalak tura ruahman a ni.
Leivung paih endiknaah hian DC leh a thawhpui te bakah PWD, PHE, Geology & Mining, AMC, Mizoram Pollution Control Board leh PUC atangin mithiam te an tel a ni.