Aizawl : Tanhril Local Council leh All NGO te chuan nimin khan thuchhuah intawm siamin, dik lo taka puh an nihnaah a tawp thlengin an do zel dawn tih an sawi.
An thuchhuahah Marina Lalchhanchhuahi tualthihna kal zel chungchangah RL Peka(L) nupui Laltanpuii’n High Court-ah sorkar leh khawtlang hruaitute laka case siam sak a dilna chu Social Media kaltlanga an lo hmuh thu sawiin, he thu hi Tanhril Local Council leh All NGO te February ni 25, 2026-a thukhawm chuan a ngai thu takin, pawi an tih thu an sawi.
January ni 27-a Mizoram Police-in Marina-i tualthihna chungchanga Press Statement a chhuah zan khan, veng mipui pungkhawm thinrim khap daih tumin, boruak muanawm taka kalpui tumin palai hna khawtlang hruaitute hian an thawk a, vawi tam ban pharin insum hram hram turin mipui an ngen a, mipui thinrim zawng zawng khap dai thei lo mah se, RL Peka te in luah lai leh an bungrua te pawh him dam taka vengin, bungraw thiarchhuah ni pawhin veng ramri thlengin an thlah liam thlap tih an sawi.
Pawi khawih ve lo ten an tawrh hlaua nasa taka ban an phar avanga sawiselna, diriamna leh rilru hliam pawh a dam fel hmaa an hma ngai tak leh duhsak taka tualthihna tuartu chhungte mitmei pawh veng hleithei lo va, an dawm hram hram ten an khing let ta mai leh mipui thinrim thil tiha a huaihawttu leh a mei zang hlaptu ang maia puh an ni chu an pawm dam theih loh thu leh a tawp thlengin Tanhril khawtlang an kal zel dawn tih an sawi.
January ni 27 zana thil thlengah RL Peka chhungte sahimna tur an ngaihtuah thu an sawi a. Hemi zan pawh hian Tanhril Local Council kaihhruainain All NGO Emergency Meeting neih a nih thu leh hetah hian pawl aiawhte an tel vek tih an sawi a. An thuchhuak leh rorel pawh a hunlai mil zela pawikhawihna leh tharum thawhna punlun tur venna atan leh mipui thinrim sosang lutuk ben daihna atana tih leh rel a nih thu sawiin, hetianga dik lo taka puhna an nihnaah Tanhril Local Council leh All NGO chuan a tawp thlengin an do zel dawn tih an sawi.