Aizawl : Congress Thalai, MPYCC chuan Chief Minister Lalduhoma kaihhruai ZPM sorkar chu mawhphurhna la ngam lovah an puh.
Inrinnia thuchhuah an siamah MPYCC chuan, Assembly Budget session neih mekah Law department changtu chief minister Lalduhoma’n bill a put luh, ‘The The Mizo Marriage and Heritance of Property Ammendment bill (2026)’ a sawi hawnnaah, Mizo hmeichhia diriamna, hmuhsitna leh dah hniam luihna, Mizo hmeichhiain kawppui/pasal atana hnamdang a neih chuan Mizo a nihna a tawp nghal, tih a sawi a. Chief Minister thusawi hi sorkar thuchhuak anga ngaih a ni a, he a thusawi hian nasa takin Mizo hmeichhia, nu leh pa leh an chhungte rilru a hliam na hle niin an sawi a. He a thusawi hian Court sang ber pawhin a tih danglam theih loh tih hial India danpui-a Fundamental Rights Article 14, 15 leh 21 te a kalh tih an sawi bawk.
MPYCC chuan hetiang taka Mizo hnam buaina a siam hnuah dawihzep tak leh mawhphurhna la ngam lo vin, Chief Minister Lalduhoma’n phatna thu sawi kualin midang a puh kual leh niin an sawi.
MPYCC chuan chief minister thusawi chu MHIP General Headquarters chuan an ngai thu tak hle tih an sawi a. He bill leh a sawi dan chu Mizo hmeichhiate tan him lo leh tha tawk lova MHIP in an ngai pawh hi a dik hle tih sawiin, he bill hi Mizo te thendarhtu hmanrua a ni ang tih an hlauhthawn thu an sawi bawk.