Thuthang a awm hi chuan anni lam hi chu a lo dik tawh tlangpui thin a, Zendaya leh Tom Holland pawh hi an innei tawh niin an sawi.
March 1, Pathianni khan Actor Awards semnaah stylist lar Law Roach chuan he thu hi sawichhuakin, Zendaya leh Holland te chu an innei tawh niin a sawi a, reporter thenkhat zawhna pawh nui chunga chhangin, inneihna chu a thleng tawh a, engkim a kal tluang e, a ti.
He awards semnaah hian Zendaya leh Holland te ngei pawh hi nalh taka incheiin, red carpet an rawn zawh dun a, nikum January 5-a Golden Globe Awards semnaah khan Zendaya hian a kutah inhualna zungbun a bun tawh avangin Roach-a thusawi nemnghet turin nupa dik tak angin an rawn inkai tawh a ni.
An inkar sawi hi a tam zui em avangin September 2025 khan Holland chuan nghet taka a inzui thu leh an inhmangaihna thu hi vantlang hriatah a puang a, an inzui nia sawi tanna tak phei hi chu kum 2016 daih atang daih tawh khan a ni nghe nghe.
Spider-Man: Homecoming an chan atanga inhre tan leh inngaina chho tan niin, an pahnih hian theihtawpin an thup char char thung a, hun a rei deuh hnu chuan an inneih thu hial puanin a lo awm ta. An inneihna hmun leh sawm bikte hmaah a ni em tih engmah puanzar a ni zui lem lo a, anmahni chei thintu stylist lar Roach-a sawi danin an innei ngei tawh a ni tih chu kan hriat a ni ta rih ber a, anmahni lam pawh an la tawng chhuak ve thuai turah ngai ang.