Mikel Arteta chuan Arsenal-in nomawi pali an lak theihna tur lam a ngaihtuah rih loh thu a sawi uar hle a, Champions League-a an hmabak a hriatin a tiphur hle tih a sawi thung.
Arsenal hian Champions League round of 16-ah Bayer Leverkusen an tum dawn a, chumi hnuah an tlang zel a nih chuan quarterfinal-ah beisei loh taka che tha, Bodo/Glimt emaw, Sporting Lisbon emaw an tum thei bawk ang.
Arteta enkawl Arsenal hian inelna hrang hrangah beiseina an la nei vek a, thla lehah Manchester City nen Carabao Cup final an khel dawn a, Premier League hmahruaitu an ni mek bawk.
Tun kar tawpah FA Cup 5th round-ah League One club Mansfield Town an tlawh dawn a, an chak a nih chuan semifinal an lut dawn tihna a ni.
“Inelna palia kan la dam vek avang hian kan phur hle a, team an che fuh chho viau zel bawk a, hei hian beiseina nasa tak min siamsak mek a ni,” tiin Arteta chuan a sawi.
“Tuna kan hun tawn mekah chiah hian rilru kan pek a pawimawh a, kan tana pawimawh hmasa ber chu Chelsea nen kan inkhel tur hi a ni,” tiin Pathianni zana an London thenawm nen an inkhelh hma lawk khan a sawi.
Nomawi pali an lak theihna tur lam a ngaihtuah chhin em tih zawhna chhangin Spanish manager chuan, “Ngaihtuah chhin vak lo, a tawpna tur lam ai chuan tunah hian team anga kan tih dan leh kan kalphung hi chhunzawm zel turin eng nge kan tih ang tihah ka rilru ka pe zawk a, chumi atang chuan a theih anga hma sawn zel kan tum a ni,” a ti.
“A ruala nomawi pali la thei an la awm lo a, thil harsa tak a ni. Khelh khat tetein kal zel phawt ila, inelna tinah a tawp thlen theih ngei tumin theihtawp chhuah phawt ila, chu chuan kan hma hun a hril ang,” tiin Arteta chuan a sawi bawk.
Arsenal hi tun ang hun season chawhnuah hian an tawlh thluk theih em avangin rin an hlawh tawk lo thin a. Hetih mek lai hian tun season-ah hian rinhlelhawm taka awm zauh chang nei thin mah se an kaltluang chhunzawm leh mai thin a, an hmabak ko tak pawh paltlang theih beiseitu an awm ve mek.