Serchhip District Bawrhsap Paul L.Khuma chuan Miss Mizoram 2026 thlanna neih tura Serchhip district aiawh turin Vanlaltanpuii, Serchhip Bazar chu thlan a nih thu a puang.
ZONET TV Pvt Ltd-in Mizoram Journalists’ Association (MJA) thawhpuia Miss Mizoram 2026 thlanna an neih tura Serchhip District aiawh tur puanchhuahna hun hi thawhlehni zan khan Serchhip Press Club-ah hman a ni.
Serchhip District Miss atana thlan LP Sanglura fanu Vanlaltanpuii hi Serchhip Bazar Vengah cheng mekin, kum 24-a upa leh ft. 5.7-a sang a ni a, a nu chu Lalremruati niin, zirna lamah Serchhipah pawl 10 thleng zo-in, Goodwill English Academy, Little Flower Convent School leh Marian High School-ah te a kal thin a, pawl 11 leh 12 hi Baptist Higher Secondary School-ah zo-in, Higher & Technical Institute – Mizoram (HATIM), Lungleiah Bachelor of Social Work (BSW) a zo leh a, tunah hian Serchhip District Child Protection Unit hnuaia Child Helpline Unit-ah a thawk mek a ni.