Mexican drug lord lar tak, Nemesio Oseguera Cervantes, ‘El Mencho’ tia hriat bawk chu Thawhlehni khan a chhungten rangkachak kuang chhungah dahin an phum.
Cartel hruaitu hi February thla tawp lam khan a bodyguard-te leh a man tura tirh Mexican special force-te inkara silai hmehpuahah hliam turin a thi zui a ni.
Kum 59 mi, Jalisco New Generation Cartel (CJNG) hlauhawm tak dintu hi an rama man duh ber a ni a, US chuan a man theihna tura thu hriattirtu hnenah lawmman $ maktaduai 15 pek a lo tiam tawh bawk.
A thihna hian phuba lak nana tharum thawhna nasa tak a thlen a, cartel member-te chuan Mexican state 20-ah lirthei an hal a, kawngpui an dang bawk.
Cartel inkulhna, Jalisco state-a Guadalajara bula vuina neihnaah hian National Guard member-te chuan tharum thawhna thar a chhuah loh nan an veng.
Inkhawm neih hma hian vuina in chhungah pangpar lian tak tak an phur lut tih hmuh a ni a, ar insual a ngainatzia lantir nan ar anga siam pakhat pawh a tel.
AFP news agency chuan pangpar a dawnte phura thlanmual panpui tur hian lorry panga a ngai a, a tam zawk chu hming tar lan lohva thawn a ni tih a tar lang.
Vuinaah hian band-in ranchero music leh narcocorridos – ruihhlo lalte fakna hla an tum.
Oseguera-a kuang rangkachak rawngin thlanmuala chapel-a a thlen laiin hnam hla, El Muchacho Alegre (The Cheerful Boy) an tum niin tual chhung media-te chuan an tar lang bawk.
Darkar khat chhung inkhawm an neih hnuah a suntu, a tam zawk an nihna thup nana hmai tuamte chuan thlan panin kuang hi an zui a ni.
Mexican chanchinbute chuan ruihhlo lal dangte nena khaikhin chuan a thlan hi a mawlmang hle tih an sawi a, a dangte chu thlan in lian tak taka phum an ni fo thin.
Oseguera-a kaihhruaina hnuaiah CJGN hi ram hrang hranga dan bawhchhe pawl chak tak a ni a, Jalisco-a an hmun atanga Mexico state dang tam takah a darh a, ruihhlo siam leh hralhnaah a inhnamhnawih nasa.
Mexican special forc-ten Oseguera an thah hi President Claudia Sheinbaum-i sorkar tan chuan hnehna anga ngaih a ni a, US President Donald Trump-a chuan ruihhlo tawlhruk dona kawnga nasa zawka hma la turin a nawr nasa hle a ni.
Cartel hruaitu chak takin a kalsan hmun ruak hian hun rei lote chhungin tharum thawhna nasa tak a thlen hlauhna a awm a, anmahni chhunga pawl hrang hrang, member sang tam tak nei nia inchhutte chuan thununtu ber nih tumin an inbei a, chu chuan pawi nasa tak a khawih thei thin a ni.