Aizawl: Aizawl East II bialtu MLA B. Lalchhanzova’n Saron Veng Branch YMA hnenah Pick-up a hlan.
Bialtu MLA B. Lalchhanzova hian MLA Local Area Development fund hmanga lei lirthei, pick-up chu nimin khan a bial chhunga, Saron Veng Branch YMA hnenah a hlan a ni.
Hlanna inkhawm tawi neihah supply minister ni bawk, B. Lalchhanzova chuan, “Kohhran leh khawtlang tana kan intihropui viauna hi mipui hian an lawm lo va, mipui nen innel tur chuan kan zavai hian luanliam za a tul a, kan awmna a san lutuk a, kan luan san lutuk chuan miin min pawh thei dawn lo va, ram hruaitute hi chhiahhlawh rilru pua kan awm chuan kan khawtlang leh ram rorelnaah pawh kan inpawh dawn a, mi hniam berte tan pawha banphak kan nihna hi mihring kan nih chhung hian a pawimawh a ni,” tiin, thawhhona tha hi ram leh hnam tihlutu a ni tih a sawi.
Bialtu MLA chuan party avanga thawkho tur an nih loh thu leh mipuite avang zawka thawkho tur an nih thu a sawi a. Kum khatah MLA-in Fund Rs nuai 200 a nei a, MLA fund an hman dante chu mipuiin an hriatpui a tul hle a, MLA Fund hmanna hriatsak hi mipui chanvo a nih thu a sawi bawk.