Aizawl: Central YMA chuan tun hnaia Mizoram State Legislative Assembly-in ‘The Mizoram Marriage Divorce & Inheritance of Property Act, 2014’ siam thatna bill a pass chu hnam dang pasala neih that lohzia leh pawizia tar lanna tha takah an ngaih thu an sawi.
Thawhtanni zana Central YMA Central Executive Committee chuan Assembly session-ah ‘The Mizo Marriage Divorce & Inheritance of Property Act, 2014’ hman mek siam thatna (Amendment Bill), ‘The Mizo Marriage & Inheritance of Property (Amendment) Act, 2026’ a pass chungchang ngaihtuahin an thukhawm a. He dan hian Mizo hmeichhia hnam dang pasala neite a huam loh avangin hnam dang pasala neih a that lohzia leh pawizia tar lanna tha tak niah an ngaih thu an sawi.
Central YMA chuan YMA Inkhawmpui Lian vawi 75-na, October 21-23, 2025 chhunga Sakawrdai-a neihah khan YMA Khawih No. 3-na ‘Mizo hmeichhiaten hnam dang pasala an neih zel loh nan Central YMA hian inzirtirna nasa zawkin kalpui rawh se’ tih rel a lo ni bawk avangin hetianga hnam humhalhna leh himna tura Mizoram State Legislative Assembly-in bill a pass hi a lawmawm an tih thu an sawi bawk.