Aizawl: Sesawnga Central Training Institute-ah nimin khan 11th Batch, Excise & Narcotics, Basic Training zote pualin ‘Passing Out Parade’ hun hman a ni a. Excise & Narcotics Minister Lalnghinglova Hmar chuan khuallian niin hun a hmanpui a, Adviser to Chief Minister Lalmuanpuia Punte-in khualzahawm niin a telpui bawk.
Training hi September 1, 2025 atang khan tan a ni a; training chhuakte hi an vaiin mi 22 niin, sub-inspector 12 leh constable 10 an ni.
Minister chuan thu sawiin chief minister thlawpna hnuaiah Excise & Narcotics Department chu department hmasawn berte zinga mi a nih thu a sawi a. Department-ah thawktu indaih lohna a nasat thin thu sawiin tun kum hnih kalta chhungin thawktu, mi thar 28 direct recruitment-a lak fel an nih tawh thu te, mi 41 lak belh lehna tur pawh buaipui mek a nih thu leh post thar pawh 16 siam a nih thu a sawi.
Heng bakah hian district thar pathumah excise station hawn thar a nih thu sawiin inspector awpna hnuaia awm thin kha Lawngtlai nen assistant commissioner awpna hnuaia an awm tawh tur thu a sawi a. Tunah Sairang leh Bairabi-ah excise station thar hawn phalna an nei leh tawh thu a sawi bawk.
END minister chuan an department-in tun hnaiah lirthei thar 21 an dawn thu sawi bawkin ruihhlo dona tura sorkar inbuatsaihna vek a nih thu a sawi a. Training chhuak tharte pawh theihtawp chhuah tur leh ruihhloa inhnamhnawih lo turin a chah.
Khualzahawm Lalmuanpuia Punte MLA pawhin thu sawiin END a thawktu lak tharte chu party induhsakna tel lova fair taka lak an nih thu a sawi a. Mahni inrintawkna nena tha taka hna thawk tura fuihin, dan ang taka lak an nih angin dan ang taka thawk tura an phut let thu a sawi.
CTI Commandent Lalrengpuia’n training chhuakte rinawmna thu tiamtirin training neih chhunga ti tha zual mi pangate hnenah minister-in lawmman a hlan bawk.
He hunah hian END Commissioner Z. Lalhmangaiha leh END Joint Commissioner Peter Zohmingthanga te bakah department mi pawimawh eng emaw zat an tel.