Manchester United coach Michael Carrick chuan striker Benjamin Sesko chu bench atanga luta a khelh that em avanga bul tantir tura ngenna awmte chu a hai der a, bul tantir ngei ngei tur a nih bik loh thu a sawi.
Thla hmasaa Darren Fletcher-a hnuaia an khelh zawk lai khan Burnley nena 2-2 a an inhnehtawk tumin Seso hian goal hnih a khung bak kha chu Premier League inkhelah bul a tan zui lo va, Nilaini zana Newcastle United laka an tlawm tumin bul a tan leh tawh thung.
Nikuma € maktaduai 76.5 senga an lak luh, Slovenian striker hian bench atanga a luh hnuhnung vawi a khelhah goal li a khung tawh a, hei vang hian mi tam tak chuan bul tan tura an duh thu an sawi nasa hle.
Carrick chuan, “Tunlaia thil awm dan hi a tha zawng zel a ni a, thil tha lo lam hawi chuan thutlukna ka siam hauh lo vang,” a ti.
“Team angin kan khel tha a, hnehna kan chang thin bawk a. Hetiang hi kan nih chhunzawm reng ang tiin ka la inthlahdah phah chuang lo. Ben-a hi eng ang taka tha nge a nih tih kan hre chho zel a, dinhmun duhawm takah a ding mek,” a ti bawk.
Tun hnaia an inkhelhah player pangngai deuh hlir bul a tantir chhan an zawt a, Carrick-a chuan an team chak chhoh zelna tur leh player zawng zawngte tihlungawi kawngah inbuktawk taka thil kalpui a tum thu a sawi.
Carrick-a’n Manchester United a enkawl atang khan tlawm nei lovin an kaltluang hle a, Magpies laka Nilaini zana an tlawm kha an vawi khat tlawmna a ni a. Premier League-ah vawi nga an khelhah vawi khat an tumpuite nen an inhnehtawk tih loh a dang palina chuan ab chak vek a, an dinhmun pawh a tha leh viau rih.
“Kan chet fuh theihna chhan hi thil tam tak a awm a, hetiang team enkawl thiam hi chona lian tak a ni. Kan khelh that chuan result duhawm tak kan nei thin a, player siksawi dan tawk pawh thiam a tul hle,” tiin Carrick chuan a sawi.