Aizawl: Mizoram Assembly House Leader Lalduhoma’n tun hnaia MNF member pakhatin Gangtok-a an zinnaah zu ruia puh a nih chungchang a sawi fiah.
Thawhlehnia Assembly Budget Session neihah Speaker Lalbiakzama chuan March 3, 2026-a MNF member Robert Romawia Royte-in house leader chungchang a sawi chu house record atangin nawh reh a nih thu a puang a. Speaker chuan a sawitu pawhin nawh reh a duh tih a sawi bawk.
Hemi hnu hian House Leader Lalduhoma a ding chhuak a, Gangtok-a an kal chu kum 20 liam ta, kum 2006 a nih thu sawiin ni khat an cham thu a sawi a. “Kan thlen hun tak ka hre ta lo, 1:45 vel niin ka hria,” a ti.
Lalduhoma chuan, “PAC chairman ka nih lai a ni a, R Lalzirliana MLA, Lalrinliana Sailo MLA, D Thangliana MLA, Vanlalthaliana MLA leh official pahnih kan kal a, kan hlim em em a, hlim takin kan kal a, hlim takin kan haw a, khatiang thil kha thleng ni se kha tih lai khan a ri hluai ang tih chu thil chiang sa a ni,” tiin kum 20 liam tawh hnua phuahchawpa thil an ti chu pawi a tih thu a sawi.