Mizo Students’ Union (MSU) chuan Staff Selection Commission (SSC) kaltlanga kum 2024-a Border Security Force (BSF) hna lakah hnam dang pariatte chu Mizoram mi anga residential certificate (RC) lem siamchawp hmangin lak an nih thu an sawi.
Ningania Aizawl Press Club-a thu thar thehdarhtute an kawmnaah MSU President B Lalkhawngaihzuala chuan kum 2024 khan SSC-in BSF hnuaia Constable GD (General Duty) tur lakna exam a buatsaihah Mizoram state quota-a mi 10 lak zingah pariat chu Mizo ni lo leh Mizoram mi an nih loh thu sawiin, “Heng mi pariatte hian DC Aizawl leh DC Mamit atanga lakchhuah ni awm tak residential cerificate an nei vek,” a ti.
B Lalkhawngaihzuala chuan heng RC-te hi Ministry of Home Affairs, Subsidiary Training Cente, Border Security Force, Indore verification ti turin Aizawl DC leh Mamit DC-te chu July 19, 2025 khan a rawn hriattir a. He verification ti tura an hriattirna leh DC-ten an chhan letna hi RTI hmangin MSU chuan an dil chhuak a, he thil thleng hi hriat chhuah a ni ta tih a sawi.
He verification ti tura an hriattirna leh DC-ten an chhan letna hi RTI hmangin MSU chuan a dil chhuak a. Aizawl DC hian August 4, 2025 khan chhanna thawn letin heng mite RC hi a lem a nih thu an hriattir a. Mamit DC pawhin September 1, 2025 khan chhanna thawn letin heng mite RC hi a lem a nih thu leh certificate issue-tu hming anga tar lan, Lalhmingliana, SDC tih chu hetih hunlai hian hetiang mi an awm loh thu an hriattir bawk a. Heti chung hian heng mite hian January 10, 2025-a training an zawm chu an chhunzawm zel tho a, January 24, 2026 khan training chu zovin Jammu leh Kashmir lamah post vek an ni tih a sawi bawk.
MSU president chuan, heng mite hi khawi state mi nge an nih an hriat theih rih loh thu a sawi a, hetianga certificate lem chiang tak hmanga Mizoram quota an lo luah ringawt hi pawi an tih a sawi a. DC pahnihten certificate lem a ni tih an hriattir chunga an training leh an service an chhunzawm thei tho chu mak an tih thu sawiin hemi chungchanga thil fel lo lian tak awm niin an hria a, chhui chian a nih theih nan leh heng mite hi hremna pek ngei an nih theih nan thuneituten hma la thuai se an duh tih a sawi.
Heng mi pariat zinga pangate hian Mualveng, Tlangnuam, Aizawla cheng angin RC an nei a, pahnih hian Chilui, Mamit district RC an nei a, pakhat hi a RC ang chuan Phaizau, Mamit district mi leh sa ang a ni.
Hemi te ruala Mizo tling chu Lalremmawia s/o Thangliana, Hunthar Veng, Aizawl leh Fredy Lalhruaitluanga s/o Laldika, Republic Vengthlang, Aizawl te an ni.
MSU hian hemi chungchangah nimin khan Aizawl PS-ah FIR an theh lut a, Enforcement Directorate-ah pawh FIR hi theh luh an tum a ni.