Mizorama table tennis inelna ngaihhlut hlawh ber, 40th Mizoram State Table Tennis Championships 2025-ah medal 20 latu, UTT Mizoram Table Tennis Academy chu a pum puia champion an ni a. Inelna ngaihhlut hlawh ber, mipa maltanah Jeho Himnakulhpuingheta champion-in hmeichhiaah Caroline Malsawmkimi a champion ve thung.
A pum puia champion ni ta, UTT hian gold medal panga, silver medal paruk leh bronze medal pakua an la a. Youth Boys U–11-ah T. Rammuanpuia, Youth Girls U–11-ah Isabella V. Lalhminghlui, Youth Girls U-13-ah Hmingsangmawii, Youth Girls U-15-ah Linda Lalhmangaihmawii leh Youth Boys U-17-ah Lalrinchhana ten UTT tan hian gold medal an vaw chhuak a ni.
MTT Hall, Kawltheihuan, Mission Veng, Aizawla Thawhlehni atanga khelh tan inelna hi Zirtawpni khan zawh niin kumin inelna hi Ruby Jubilee Edition a ni a. 2025-26 season kharna ni bawkin category 18-ah Mizoram hmun hrang hrang atangin player 140 chuang an tel a ni.
Inelna ngaihhlut ber, men’s singles-ah Hopes TT Club player pahnih inhmachhawnin hriat hlawh tawh, Jeho-a’n Alberto LR. Ruata lakah 4-0-a hnehin a champion a. An pahnih hian men’s doubles-ah inkawpin an club tan gold medal an la bawk.
Hmeichhe maltanah Hopes TT Club player tho, Caroline-i’n Moumita Saha, Electric Veng TT Club chu hnehin a champion a. Kum 12 mi chauh hian Youth Girls U-17 leh U-19-ah pawh gold medal ve ve vaw chhuakin mi mala che tha ber a ni bawk.
Men’s Team
1st – Hopes TT Club
2nd – Twister X TT Club
Women’s Team
1st – Vaivakawn TT Club
2nd – UTT Mizoram TT Academy
Overall Champion
UTT Mizoram Table Tennis Academy