Inrinnia khelh zawh tak, Mizoram State Snooker Championship 2025-26-ah infiam mi atanga politic-a tun hnaia zuang zuang lut, Lalrina Renthlei a champion.
Mizoram Snooker & Billiards Association (MSBA) buatsaih inelna hi kar kal ta Thawhtanni atanga MSBA Hall, Hawla Indoor Stadium, Republic Vengthlang, Aizawla khelh niin final-ah hian Tuikhuahtlang tlangval hian PB Liansangzuala lakah 4-2-a hnehna changin a champion a ni.
Lalrina hi Mizo infiamna thei tak niin basketball-ah pawh a thei ber pawl leh Mizo player langsar ber zinga mi a ni a. Dawhkana ball hawlha inelnaah pawh nomawi vawi tam tak lo la tawh a ni.
Kumina Aizawl Municipal Corporation (AMC) inthlan mai turah MNF party chuan Ward No. XVIII-a an candidate turin an tifel tawh bawk a. A dinna tur bialah hian a chenna veng bakah Salem Veng, Venghnuai, Model Veng, Thakthing, ITI Veng, Dam Veng leh Mission Veng awmin vote leh veng tamna ber ward a ni.
Frame li la hmasa zawk (race to 4)-a inkhelhah hian PB-a’n bul tan tha zawkin frame a la hmasa a, Lalrina’n frame hnihna leh thumna la zawnin a nih rual bakah 2-1 a lehthal.
Tlawm tum mai lova bei zuiin Pb-a’n 2-2-in a nihrual leh a; mahse, 3-2-a Lalrina’n a tlansan leh hnuah theihtawp chhuah lehzualin frame a la zui leh a, 4-2-in hnehna a chang ta a ni.
Zirtawpni zana semi final-ah Lalrina Renthlei hian K Lalremruata (Sena) a hnehin PB-a hian Lalsangzela hneh ve thungin final hi an lut a ni.
MSBA hian tun thla tawp hian 9 Ball Pool Championship an buatsaih leh ang.
MSBA hian tun thla tawp hian 9 Ball Pool Championship an buatsaih leh ang.