Aizawl: BJP Mizoram-in Mizoramah AIIMS emaw, a tlukpui din a nih theih nana hmalakpui turin Vice President CP Radhakrishnan an ngen.
BJP Mizoram hruaitute chuan Vice President Radhakrishnan hi Zirtawpni zan khan Lok Bhvana-ah an kawm a, BJP State President Dr. K. Beichhua chuan kum 2018 leh 2023 MLA General Election-a BJP Mizoram-in Manifesto-a an dah tawh AIIMS damdawi in emaw, a tlukpui emaw din an tum thu an sawi chu a hlawhtlin theih nan hmalakpui turin a ngen.
Vice president chuan BJP Mizoram hruaitute thu thlen chu tha a tih thu leh AIIMS chungchang chu BJP Mizoram hruaituten palai tira union health minister hnenah ziaka lehkha theh lut tur leh theihtawp chhuahpui a tum thu a hrilh.
CP Radhakrishnan chuan, India chu tun hmain economy dinhmun hniam takah an awm thin mah se, tunah chuan World Economy tha tehnaah 4-na a ni mek a, hun rei loteah pathumna an ni thuai dawn tih sawiin, nasa takin hma an sawn mek a, India-a cheng zingah culture leh sakhaw hrang hrang biate an awm a, chung an culture leh sakhuana te chu an vawnhim a, an inzahtawn sak a tul a, mahni sakhua leh hnam ziarang chawisan kawngah rinawm a ngai tih a sawi.