Aizawl: Home Minister K Sapdanga chuan sorkar leh tlawmngai pawlin ruihhlo do kawngah chak taka hma a lak avangin ruihhlo man a to a, a tithin pawhin an nghei phah niin a sawi.
Inrinni khan Home Minister K Sapdanga hian Saiha tlawhin, DC Mini Conference Hall-ah ruihhlo do khawih department official bakah tlawmngai pawl hruaitute, MJA aiawh leh khawtlang hruaitute nen an inkawm a. An inkawmnaah hian K Sapdanga chuan, sawi duh neia kal an nih aiin ruihhlo dotute thusawi ngaithla tura kal an nih thu te, Mizorama ruihhlo luhka ber thin – hmar lam leh khawchhak lamah uluk taka ven leh hmalak anih avangin hmun dangah hlet a chhuah hlauhthawn thuah ramri hrul district tlawh kuala, an thu leh hla ngaihthla paha sawihona hlawkthlak tak neih thaa an hriat avanga tlawh anih thu a sawi.
Minister chuan sorkar leh tlawmngai pawlin ruihhlo do kawngah chak taka hma a lak avangin ruihhlo man a to a, a tithin pawhin an nghei phah a, khawpui a ralmuangin zana vak rawlai an tlem phah pawh hi thil tha tak a nih thu a sawi a. Ruihhlo ngaite hi damlo enkawla enkawl an nih hian an damlo der nasa a, hlahthlem bik chi an niin a lang lo va. Covid len laiin ruihhlo a lo lut lo va, ruihhlo ngai, an nghei vanga thi an tam phah chuang tlat lo va, rilru lama a thawh tel vang ni maiin a hriat. Chuvangin, a dim zawng ni lova enkawl a ngamawm a nih hi kan ti, a ti.
Mizorama tlawmngai pawl hrang hrangte thawhrimna an hriatpui thu leh an tha tihchak chhunzawm zel chu an tum anih thu Minister hian sawiin, an tha aia chak hi a awm loh avangin an phurna tichak zawnga hma lakna khawp sum leh pai leh facility hi chu a awm turah ngaih a ni a, District Administration kaltlangin tul leh mamawh thlen nise, anni’n home department lamah an lo thehlut zel dawn tih a sawi bawk.