Calcutta Mizo Welfare Association (CMWA) chuan kum 2026 Chapchar Kût lawmna hun chu Mizoram House, Salt Lake-ah Inrinni khan an hmang a. Education Minister Dr. Vanlalthlana chuan Kut Pa niin hun a hmanpui.
Kut Pa Dr. Vanlalthlana chuan Kolkata khawpuia Chapchar Kût lawma kal khawm Mizote chu fakin, Mizoram tan Kolkata chu kawtchhuah ber a ni a, Kolkata-a Mizo fa cheng leh khawsate chu Zo nun ze mawi lan chhuahtir kawnga hun rei tawh tak atanga tha lo thawh tawh thin an nih thu a sawi a. Dam lo leh mitthi ruang buaipui bakah harsatna tawk hrang hrangte tlawmngaih chhuaha an tanpui thin thu a sawi a. Kumin Chapchar Kût thupui angin CMWA chuan inrem leh inlungrual takin Mizo hnam tan hna an lo thawk tawh thin tiin, Mizo hnam tana malsawmna an lo nih tawh thinna chu vawng nung zel turin a chah.
Minister chuan Chapchar Kût tobul chu hlawhchhamte hnem duhna thinlung a ni tih a sawi a. Zo nun ze mawi lantira dinhmun chhe zawkte tana ke pen zel turin kal khawmte a chah a. Ram pawna an awm hian chhuang takin kan Mizo-na an tilang ngam thin tur tih sawiin, Mizo thil danglam bikna chu hnam dang hmuha thiam taka pho chhuak thin turin Chapchar Kut hmangtute a chah.
CMWA buatsaih Chapchar Kût an hmanna hun hi CMWA President C. Lalmuanzuala’n kaihruaiin, tun dinhmunah Calcutta-ah Mizo hi sang chuang an awm mek a, chung zinga mi 703 chu Mizo Welfare a inziak lut an awm mek thu sawiin, a pawimawhna hria a, Calcutta leh a chheh vel a Zofa zawng zawng te chu welfare member a inziak lut theuh turin a sawm.
Kolkata Mizoram House Joint Resident Commissioner Zoremthara Ralte chu Kût Thlengtu a ni a ni. Intihhlimna hun hrang hrang hman niin CMWA General Secretary Dr. Lalrinpuia’n lawmthu sawiin hun a khar a ni.
Chapchar Kût hi Mizo welfare member te mai bakah dam lohna leh thil dang tul avanga cham mek mikhual eng emaw zatte nen hlim takin an hmang a. Kût ruai an theh nghal a ni.