Chief Minister Lalduhoma’n Thawhtanni khan Mizoram Universal Health Care Scheme 2.0 (MUHCS 2.0) leh MUHCS Call Centre a hawng a. Empanelled hospital ni lova MUHCS hman theihna provision chu khauh zawka kalpui a ni tawh dawn tih a sawi.
Assembly Annex Conference Hall-a hawnna inkhawmah chief minister chuan MUHCS chuan kum hnihna a chuangkai ta a, tluang taka he scheme a kal theih nana tha leh zung sengtu zawng zawngte leh MUHCS zawmtu hospital-te chungchang lawmthu a sawi.
MUHCS kum khatna kha uluk takin an zir a, sum leh pai pawh an seng nual tih sawiin chief minister chuan, “Mipuite tana a thatzia kan hmuhin sum leh pai senso hi tam tham deuh mah se insen zel kan huam. Tun budget tharah hian Rs. vbc 130 kan dah a, sorkar hnathawk contribution hi Rs. vbc 26.42 vel a ni a, Asian Development Bank atangin Rs. vbc 800 chuang kan puk bawk a. MUHCS 2.0 hi a hma aia tha zawka kalpui kan tum a ni,” tiin, mipuiin inziah luh hun hawn mek chu bawhpelh lova hunbi ngai pawimawh turin a chah.
Chief minister chuan MUHCS an kalpui mek danah emergency emaw, nunna atana hlauhawm enkawlna pek kawngah emaw, empanelled damdawi in ni lova inenkawl theihna siam a ni tih sawiin, “He dan hi kan ennawn a, MUHCS 2.0-ah hian khauh zawka kalpui kan tum,” a ti.
MUHCS hnuaia inziak lut damdawi inte hnena bill pek chhuah hi khaihlak awm lovin tluang taka kalpui a nih thu leh inkaihhruaina danin ‘thla tin pek chhuah tur’ a tih laiin sorkar chuan chawlhkar tin a pe chhuak thei tih a sawi a. Hei hian sorkarin universal health coverage a dah pawimawhzia leh sum leh pai dinhmun tha tak hnuaia kalpui a nihzia a tar lan thu a sawi bawk.
- Pawimawh dang:
- MUHCS 2.0 hi April 1, 2026 atanga kalpui tan a ni ang.
- ICU a admit nghal ngai damlo te, nunna chhan nana zai nghal ngai damlo te leh accident vanga zai nghal ngai damlote chauh hi MUHCS hnuaia emergency/life threatening provision-in a huam tawh dawn.
- MUHCS 2.0-a inziah luh hun hi April 15, 2026 thleng hawn tur a ni a, May thla khar a ni ang a, June thlaah thla khat chhung ‘Grace period’ hawn leh a ni ang. Grace period-a inziah luhna man erawh chu hun pangngaia inziah luh man aiin zaa 50-in a sang tawh ang.