Aizawl: Tuisumpui luia 170 ft-a sei lei dawh, Bailey Bridge (TDR) chu PWD Chief Engineer (Road) David Sapzova’n Inrinni khan a hawng.
He lei dawh hi Siaha leh Tuipui Ferry, PMGSY kawng pawimawh tak, ‘Saiha-Rawmibawk Road’ a awm a ni a. Riasika, Amotlah leh Thiahra khua te thlunzawmtu leh district dangte nen a inkalpawhna pawimawh tak a ni bawk.
Tuisumpui luiah hian lei a awm loh avangin furpui chhung zawngin tuilian avangin heng khua – Tuipui Ferry, Riasika, Amotlah leh Thiahra khua te hi tlawhpawh hleih theih an ni lo va. Tuipui Ferry khawtlang leh a chhehvel khua ten harsa tak chungin Tuisumpui luiah hian Seasonal Bridge (timber bridge) kumtin an dawh chawp thin hial a ni.
Hetiang ‘Seasonal Bridge’ hian lirthei load sang a dawl zawh tawk loh bakah a him tawk lovin a rintlak lo va. Heng harsatnate sukiang turin kum 2023 atang khan Tuisumpui luia Bailey Bridge dawh tur hian hmalak tan a ni a. Kum 2023-2024 ah Bridge Abutment (Sub-structure) siam nan SASCI atangin Rs nuai 150 hmuh a ni.
Bridge Abutment hi ni October ni 20, 2023 ah hnathawh tan niin, March ni 31, 2025 ah thawh zawh a ni a. SASCI 2023-2024 atang hian Bridge Abutment chauh siam a ni a. PWD hotute hmalakna zarah bridge super structure, Bailey Bridge (TDR) siam nan kum 2024-2025-ah (Roads & Bridges) hnuaiah Mizoram sorkar atangin Rs nuai 250 sanction hmuh a ni.
He Bailey Bridge (TDR) siam tur hian supplier leh erection leh launching titel turin Essen Fabricators Pvt. Ltd., Kharagpur, West Bengal thlan a ni a. Nikum October 1 khan hna thawk tanin February 23 khan hna hi thawh zawh a ni.
Tuisumpui lei dawh a nih tak avang hian heng khaw pali – Tuipui Ferry, Riasikah, Amotla leh Thiahra te bakah Siaha district mipui tan pawh awlsam zawka zin veivah theih a ni dawn a ni.