Aizawl: Mizoram Pradesh Youth Congress Committee (MPYCC) chuan Vantawng khawhthla thlirna chhehvel leh Kanghmun South ramah Chief Minister Lalduhoma’n mahni inhaivurna ni ngeia ngaih ram zau tak a lei niin an sawi.
Congress Thalai chuan Inrinni khan an president Laltawnliana hovin Vantawng khawhthla bul leh Kanghmun South rama chief minister-in ram a lei nia sawi hmun tlawhin an enfiah a. Kum 2021 Serchhip bial by-election-a rethei taka insawi chunga chief minister a nih tuk atanga Mizorama mi hausa ber zingah a tel nghal tih a hmalakna hian a nemnghet nia an ngaih thu an sawi.
MPYCC hruaitute chuan Buangpui ram chhung, Vantawng khawhthla thlirna chhehvela ram tin 25 atanga 30 vela zau chu Chief Minister Lalduhoma hian kum 2024 tir khan a lei a. Heng ram hi mi panga ta lei chhawn a ni a, Kanghmun South-a ram a lei pawh mi pali ta niin, heng a ram lei zinga a then chu kumin February thla tawp lam khan vah a ni a, vah a nih atanga chawlhkar hnih pawh tling lovah hal niin, heng ramte hi sorkar department pakhat enkawltir tura ruahman niin an sawi.
Congress Thalai chuan Vantang khawhthla chhehvel leh Kanghmun South-a Lalduhoma’n ram a lei hi Vantawng ram leh Saphak lui chhak lam Vantawng khawhthla thlirna remchang hmun tha lai zawng zawng, SASCI Scheme Development of Iconic Tourist Centres to Global Scale hmanga Rope-way siamna tura Rs vbc 34.50 ruahman meka zangnadawmna dawn beisei chung leh Thenzawl Peace City-in a huam tur Kanghmun South rama mahni mi mal inhaivur tuma hmalakna nia an ngaih thu sawiin, Lalduhoma chu chief minister ni rei lo ber chunga chief minister ni tawh zinga hausa chak ber nia an ngaih thu an sawi.