Max Dowman chu England World Cup 2026 squad-a telh a nih dawn leh dawn loh chungchang a ngaihtuah thu Thomas Tuchel-a’n a sawi.
Arsenal-in 2-0-a Everton an hneh tumin Dowman hian goal a thun a, Premier League-a goal thun thei naupang ber (kum 16 leh ni 73) niin record thar a siam a. Rawlthar thiam bik hian kumin nipuia USA, Canada leh Mexico-a khelh tur football inelna lian berah Three Lions tana khel thei hial tur khawpin hmasawnna a nei a ni.
Uruguay leh Japan nena friendly match khel tur mi 35 a thlan hnuah Tuchel-a chuan, “Everton laka a goal thun kha a ropuiin a pawimawh hle a, mi hriat a hlawh phah hle a ni. A kum ngaihtuah chuan thiamna bik nei a ni a, a khel tha hle,” a ti.
Tuchel-a chuan sawi zawmin, “Rinhlelh rual a ni lo. Max-a chungchang min hrilhtu apiangin an fak a; mahse, a dinhmun dik takah chuan hmun pawimawh chan tumin a la bei mek a, bul tantu erawh a la ni lo. Training-na hmun tha berah awmin player thiam ber berte lakah a inzir mek a, chutah chuan thawhhona hi a thupui ber a ni,” a ti bawk.
“Hetiang rawlthar hi kan hre reng a, kan thlir reng bawk. Tunah rih chuan Arsenal-ah a hmun tur chuh turin dinhmun tha takah a ding a ni,” a ti.
“World Cup-ah hian koh luh theihna hun kan la nei a. A phurna leh huaisenna hi vawn reng kan duh a ni. Tunah rih chuan koh a, thawm neih vak kher a ngai lo a, thlan tur dang pawh kan ngah hle,” a ti bawk.