April 21, 2026-a AMC inthlan lo awm tur atana Congress party (INC) chuan an party candidate tur an puang a. MPCC President Lal Thanzara’n candidate turte hi puangin election manifesto a tlangzarh bawk.
Thawhtannia Lal Thanhawla Auditorium-a candidate puanna inkhawmah MPCC president chuan tun tum AMC inthlan lo awm tura an party candidate atana kohhran leh khawtlanga inhmang mi tha tak takin an sawmna an pawm chu lawmawm a tih thu a sawi a. AMC hi Aizawl khawpui enkawl a cheitu tur an ni a, tunah chuan Aizawl khawpui hi chei that a nihna hmuh tur a awm lo va, sum erawh an hmang ral ve reng si a. Tunah hian Aizawl khawpui chei tha tur leh tihmasawn lehzual turin Congress an lo pen chhuak leh ta tih a sawi.
Lal Thanzara chuan Congress party-in Mizoram an lo kaihruaiin an lo enkawl tawh a, chumi hnuah party pahnih ten Mizoram an enkawl ve leh tawh bawk tih sawiin, “Congress party hotuten ram kan lo enkawl dan kha tuma’n an tluk lo va, tuna ZPM sorkar hnuaiah hi chuan lei an ba tawk tawk ta mai a ni,” tiin, enchhin sorkar an hrawn mek a, inthlan a hun takah an tih loh chhan ni a lang kawng siam leh sawhthing leite an zo ta a ni ang, tunah chuan AMC inthlan hun pawh an puang ve ta tih a sawi.
Assembly session neih zawh takah ram hruaituten Aizawl enkawl an tum dan kan hria tih sawiin Lal Thanzara chuan, “Aizawl khawpuiah hian thil pawimawh engmah dah tawh loh tur tih thute an sawi chhuak hial a ni. Chu mai a ni lo va, Aizawl khawpui hi Thenzawl lamah sawn pheite an lo tum hial a. Chuvangin, Aizawl khawpui enkawlna hna hi ZPM chungah chuan dah ngam a ni dawn lo,” a ti.
MPCC president chuan Congress party-in khawpui enkawl tur hian mi lar satliah leh hausa ringawt an zawng lo va, khawtlang hmangaihtu, Aizawl khawpui tan a thahnemngai tak a hnathawk thei tur an zawng zawk tih a sawi bawk.