Aizawl Municipal Corporation (AMC) inthlan lo awm tura ZPM candidate puanna leh campaign hawnna hun Thawhtanni khan Vana Pa Hall-ah neih a ni.
ZPM candidate puanna leh campaign hawnna inkhawm hi hun hnihah then niin chawhma lamah ZPM Advisor Lalnghinglova Hmar-in a kaihruai a, ZPM Elected Office Bearers (EOB) Lalduhoma’n ZPM sorkar kum hnih hmalakna lehkhabu a tlangzarh.
Chawhnu inkhawm hi ZPM Media Chairman B. Lalchhanzova’n a kaihruai a, ZPM President Lalliansawta’n candidate tur mi 19-te puangin campaign a khuh hawng a, ZPM Adviser K Sapdanga’n 2026 AMC Election Manifesto a tlangzarh bawk.
Inkhawmah Chief Minister Lalduhoma chuan ZPM kaihhruai sorkarin kum hnih chhunga AMC huam chhunga hma an lo lak tawhna leh hma an lak mekna hrang hrangte sawiin, “Kum hnih chhung leka kan rama kalphung thar mipui sorkar hnathawh a ropui a. Aizawl khawpui hmasawnna tura kan thawh mek leh ruahmannate hi tipuitling turin ZPM kaihhruai AMC kan mamawh,” a ti.
Lalduhoma chuan khawpui chhung hrim hrim hnathawhna atan Rs nuai 3,500 an dah tih sawiin, “Khawpui chhung hrim hrim hnathawhna atan Rs nuai 3,500 kan dah a, UT kan nih atangin kum 54 a lo ni ta a, kum 54 chhung hian tun ang tluk hian Aizawl khawpui chhung kawng hi a la tha ngai lovin ka hria. Term khat chhungin district capital leh khaw kar kawngte hmel a dang lam chak viauin ka ring,” tiin, tun ang tluka Aizawl khawpui kawng a that hi a la hriat ngai loh thu leh, kum hnih chhung leka an tih pawh heti a nih chuan an sorkar leh hunah phei chuan Mizorama khawpui hrang hrang leh khaw kar kawng thlengin a la tha dawn chauh tih a sawi a. ZPM sorkar hnuaia minister hrang hrangte thawhrimna leh inpekna fakin, Aizawl khawpui hmasawnna tur leh din thar lehna tura mipuiin ZPM siam AMC thar thlang turin mipui a chah.
2026 AMC Election Manifesto tlangzarhtu ZPM Adviser K.Sapdanga pawhin thu sawiin kum hnih chhung lekin thil ropui tak a la tih hman lo va, bul an tan chauh tih sawiin, “Heti chung hian kum tam tak lo sorkar tawhten an thil tih leh tuna kan tih chin an khaikhin chiam fo hi a lawmawmah ka ngai. Kawng tam takah Zoram hmel thar kan hmu mawlh mawlh a, thalaiten min beisei sanzia kan hriat hian kan phur tak zet a ni. Mipui hian kalphung hluia lut leh turin he ram hi an duh lo vang tih ka chiang a ni,” tiin, Aizawl khawpuia roreltu tur thlan turah ZPM an phur thu a sawi bawk.