- Rinfela Zadeng
Zoramin ruah tui kan dawng tan a, lo neitute leh mipui mimir tan pawh thil lawmawm tak a ni. Tui tel lo hian kan nung thei lo a, khawvel pumah hian kum khat chhungin mihringin tui kan hman zat hi 3,997,039,700,000 cubic meters niin United Nations chuan a tarlang a Tui pawimawhzia hi kan sawi tawk zo thei awm lo e.
- A inbuk tawk tura Siamtu duan
Pathian awm ring lo te pawhin kan leilung hi inbuk tawk taka awma inmamwh tawn, inring tawn vek kan nih thu hi chu an hnial thei lo a. Keini Kristian, Pathian ringtute phei chuan engkim hi a nih dan tur leh tha a tih em ema Pathian siam vek a nih thu Genesis -ah kan hmu a nih kha. Tui leh ramngaw, ran leh ramsa, mihring leh thil dang zawng zawngte – nunna nei leh nei lo te chen hian Pathianin a duh taka a siam leh inringtawna he khawvela damkhawchhuak tlanga thi tlang tur hian min duang a ni tih kan hre vek awm e. Chu chu Eco -System tiin Science chuan a sawi a, Pathian thu zirna huangah pawh Eco – Justice/ Eco – Theology tiin tun laia zirtur (subject) pawimawh ber pawl a ni ti ila kan sawi sual awm lo e.
- Hmasawnna leh rawmngaw chhia
Khawvel hmun dang leh Mizoramah te ngei pawh hmasawnna tur thil lian tham (sustainable development) kan tih dawna a tuartu hmasa ber chu ramngaw hi a ni awm e. Kan inkalpawhna kawngpui an laih zauhna ringawtah pawh ramngaw a chhiat nasat zia hmutu kan ni a. Khawvel changkanna lo thang zel hi kan ramah neih ve zel kan duh a, kan la duh zel dawn a, kan la nei zel bawk ang. Thlawhna tumhmun te pawh kan la duh belh ang; chung zawng zawngah chuan kan ramngaw hi a tuar hmasatu chu an ni thin. Chutiang a lo thlen chang pawha kan tih tur hmasa ber chu – hmasawnna kan kalpui zawh hnuah kan ramngaw chhiate a theih ang anga hnawhphuia siam that leh hi kan mawhphurhna a ni tih hi hre chiang ila. Chu chu khua leh tui kan nihna piah lamah Pathian thu pek a ni tih kan hriat nawn te pawh a tul hle a ni.
- Tui leh Pathian thuawih
Bible-ah hian tui pawimawhzia hi hmun hrang hrangah kan hmu a, kohhran serh leh sang pawimawh tak Baptisma pawh tui nena inkaihnawih tlat a nih hi. Kan Lal Isua Krista ngei pawhin amah intehkhin nan tui hi a hmang a nih kha (Johana 4:14). Tui mamawha tuichhunchhuaha tui chawi mek Samari Hmeichhe tan kha chuan Lal Isua thusawi leh tehkhinthu kha fiah khawp ang le!
Heti taka pawimawh tui hi kan humhalha hnianghnar taka hman tur kan neih zel theihna tur chuan kan ramngaw te kan humhalh a ngai a. Kan chenna khawvel, lei lung leh ramsa, thing leh mau – environment – humhalh hi Pathian thupek khauh tak a ni tih hi kan inzirtir ngun a tul ta hle mai. Sualna chi hrang hrang – ruihhlo, mipat hmeichhiatna, eirukna adt – ang em em hian kan chenna leilung suamsa zawnga chet hi kan ngai sual loin chutiang em ema sual thuk chu a ni kher lo thei bawk. Mahse kan chenna khawvwl kan tihchhiat avanga a nghawng tha lo, thihna leh natna tam tak lo thleng leh tui in tur kan tlakchham avanga harsatna kan tawh zawng zawngte hi ngaihtuah ila. Pathian pawi kan sawina hi a lian viau lo ang maw?
Chuvangin tui in tur kan neih zelna tur te, ruah tui tha taka kan dawn theihna tur te, ramsa leh thilsiam dang ten he khawvel – Pathianin an tana pek ve tho hi hlim taka an luah zel theihna turin kan phak tawk theuhah kan chenna leilung hi i humhalh zel ang u tiin kan insawmin kan inngen a ni e.