Aizawl: Chalfilh Group YMA Rorel inkhawm vawi 5-na chu Darlawn Town Hall-ah Ningani khan neih a ni a, Central YMA Asst. Secretary SF David Ngursangzuala’n a hmanpui.
YMA kum puan, ‘Ruihhlo Do’ a hawnnaah SF David Ngursangzuala chuan inkhawmpui lianin kumpuan a puan chu theihtawp chhuaha beih a ngai tih a sawi a. “Chhungkua, khawtlang, kohhran anga kan chet chhuah a tul tak zet a. Sawiseltuten min sawisel thin mah se, kan theihtawpin kan bei zel tur a ni,” a ti.
YMA chu tlawmngai pawl a ni a, hruaitu tlawmngai thei lo, puih ngai leh tanpui ngai an awma kaih thawh theih loh an ni tur a ni lo va, YMA chu nileng zankhuaa duty a ni a, a inthlahdah theih loh thu a sawi bawk.
Rorel inkhawm chawhma lamah Formosa Foundation kaltlangin Reliance Foundation-in Chalfilh Group YMA hnenah hian ambulance motor an hlan a. Group YMA aiawhin President JW Lalrinawma’n a dawng a ni.
Chalfilh Group hi kum 1997-a din a ni a, branch 20, jt. YMA panga awmin in 4,316 a awm mek a, YMA member 8,877 awm mek a. Nikum khan ram pum huap kumpuan ti tha 2-na leh tuihna humhalh tha lawmman 2-na an dawng.
Asst. Secretary hi CEC member pasarihin an tawiawm a ni.