Mizoram sorkarin March 23 thleng khan sawhthing hralhna hmun tur bika ruahman, Secondary Collection Centre (SCC) 64 zinga 14 atangin kg 1,6,45,967 a hralh tawh.
Mizoram Agriculture Marketing Board (MAMB) Co-chairman Dr. K.C. Lalmalsawmzauva chuan February 2 atanga support price awma kut hnathawktuten sawhthing an hralh theih hun chhung tura ruahmanna kal mekah Thawhtanni thleng khan sawhthing hralhna hmun tur bika ruahman SCC 64 zinga 14-ah hralh a ni tawh tih a sawi.
Heng SCC-te hi Aibawk, Chawngtlai, Cherhlun, Hnahthial I, Kanghmun, Khuangleng, Mamit, Reiek, Tawipui North 1, Thingdawl, Tipa, Tuidam, Tualcheng, leh West Phaileng atangin Rs. 5,10,25,118 man hralh a ni tawh a. Heng SCC-ah hian sumdawngte chuan kg khat Rs. 30 atanga 33 inkarin an lei a, sorkarin ba awm loa lei tura sumdawngte a tih angin sumdawngte hian an leina man hi an pe vek tawh a ni.
MAMB-in support price awma sawhthing hralh theih hun tura a bituk chu February 2 atanga May 30 thleng a ni a; SCC 64-a sawhthing awm zat tura tar lan chu quintal 3,46,470 niin tuna sumdawngten an lei tawh zat hi a vaiin quintal 1,6,460 a ni.
Mizoram sorkar chuan February 2 atang khan SCC katlangin lo neitute sawhthing lei tum mah se sumdawngten kut hnathawktute sawhthing an leina man hniam ber tura a bituk, reserve price Rs. 40 atanga 45 inkar chu a san em avangin leitu tur an awm mai lo va, February 9 khan reserve price hi Rs. 30-35 inkarah tihniamin SCC pahnih, Mamit leh Tuidam atangin sawhthingte hi hralh chhuah chauh a ni.