Sorkar hnathawk maktaduai thum chuangin India chhiarpui nei tan dawn

Indian thuneitu maktaduai thum chuangin khawvela mihring tamna ber rama mi tin chhiar hna thawkin kum khat vel hun an hmang dawn a, he hna lian tak hi COVID-19 hripui vanga tikhawtlai kha a ni.

Kum sawm dana neih thin chhiarpui hi dan pangngaiah chuan kum 2021-a neih tur kha a ni a, April 1 atangin tan a ni dawn a, online-a inziak lut duhte tan hun rei lo tê hawn a ni dawn niin sorkar chuan Thawhtanni khan a sawi.

Hemi hnuah hian in tin luta inchhiar thawh hnih a awm zui ang a. A hmasaah chuan in leh chenna dinhmun tar lan a ni ang a, pahnihnaah mipui leh an eizawnna leh khawtlanga an dinhmunte tar lan a ni dawn niin Census Commissioner Mritunjay Kumar Narayan-a chuan thuthar lakhawmtute a hrilh.

Mihring tluklehdingawn 1.4 chuang awmna, India hian China a khum tawh a, kum 2023 khan mihring cheng tam berna a ni thar tih United Nations Population Fund chuan a tar lang.

Mi thiam leh economist-te chuan India ram mipui tam hi hlauhthawnawmah an ngai lem lo thung a. Sorkarin hun rei tak chhung kal tawh atangin hnathawk thei rual thalai tam zawk chu hna thawk tura thiamna nei tura a chher danah an lo fak tawh thin a, hetih laiin eibar dinhmun tha leh lian tak tak tam tak chu hnathawktu tlahniam leh tar an tam avangin an buai mek a ni.

Chhiarpuiah hian chi (caste) hrang hrangte chipchiar takin a la khawm dawn bawk niin Narayan-a chuan a sawi a. Chi bila thil kalpui hi kum sang tam tak kalta atanga awm tawh a ni a, India-a vantlang nun leh politic-ah pawh thuk taka nghawng nei phak a ni.

Chi bil political party tam tak an awm a, sorkar hnuaia hnathawhna leh college tam takah chuan a thawk leh lut thei turin chi hniam zawkten chanpual pawh an nei mek hlawm a ni.

Chi bil chhiar hi a thlawptute chuan sorkar tanpuina leh chhawmdawlna dawng tlakte chanchin kimchang neih nan a tul tih an sawi thin a, a sawiseltu lam chuan khawvela ram chak ber nih tumna⁠ah hian hetiang hian hmun a chang lo niin an sawi ve thung.

India hian kum 80 hnua a vawi khat nan kum 2011 khan a chi bil chhinchhiahna hi a siam a; mahse, a dik tawk leh tawk lohvah ngaihdan inang lo a awm avangin a chhinchhiah hi kimchangin ⁠puang lo.

Nakkum March thlaah chhiarpui hi zawh hman beisei a ni a. Narayan-a chuan chhiarpui atanga thil chhinchhiah eng emaw zat chu a vawi khat nan digital-a dahin tihchhuah a nih tur thu a sawi.