Aizawl: Conservation Mizoram chuan Zawlsei khaw lo halnaa chinghnia (Asiatic Wild Dog/ Dhole) pariat kah a nih thu leh a thi paruk hmuh a nih thu social media platform hrang hranga thlalak nen a darh chiam mai hi pawi an ti a, hetiang anga nungchate chunga hleilenna hi thleng nawn tawh lo se an ti.
Hemi chungchangah hian Conservation Mizoram chuan thil awmdan a ngaihven reng a, dan bawhchhia hrem ngai an awm ngei niin a lang an ti a, hremna lekkawh ni ngei se an ti a; thuneitute hmalakna pawh an ngaichang a, a tul anga puibawm tur pawhin an inring reng tih an sawi.
Conservation Mizoram chuan chinghniate hi nungchate inei chhawnnaah hmun pawimawh tak luah an ni a, khawvel huap pawha mang mai hlauhawm hnai tak an nih bakah Indian Wildlife (Protection) Act 1972 leh he dan ennawn thar zelah pawh a bik taka humhalh lai (Schedule II) an ni a, an chunga hleilenna leh diriamna thlalak leh thuziaka lo langte hi enliam mai lova a tul ang ngeia dan bawhchhetu te hrem turin thuneitu te an phut a ni.
“Kan rama sial leh bawng vulh dan kalhmang pawh felfai zawk leh ramsate chenna tibuai lo zawnga kalpui a nih theih nan ran vulha eizawngte leh sorkar lama a mawhphurtu te pawh awmze neia hma la ngei turin kan ngen a. Kan ran vulh lai ramhnuaia chhuah zalen ten nungchate kut an tawrh changa thungrulhna thleng thin pumpelh nan leh kan ram humhalh nan heihi a mawhphurtuten ngai pawimawh ngei se tiin kan ngen a ni. Ramsa ten mihring huan-thlai leh ran vulh te a tihchhiat/tihhlum changa zangnadawmna hmuh theih dan inzirtirna te neiin hemi lama thawktute pawhin taima taka an hnate thawk thin turin kan ngen bawk a ni,” Conservation Mizoram chuan an ti.