Haiti-a khualzinte tlawh thin hmun lar tak pakhata innek buaina thlengah mi 30 vel an thi.
Chhiatna Zirtawpnia Unesco World Heritage hmun pakhat, Laferrière Citadel-a kum tin Isua Thawhleh Ni inkhawmpui neih thina thleng a, Haiti-a Nord department-a civil protection hotu, Jean Henri Petit chuan thi zat hi a la pung thei tih a sawi.
Prime Minister Alix Didier Fils-Aimé-a chuan he thil hi hmar lama Milot khuaa ‘thalai tam tak telna tourist event neih lai’-a thleng niin a sawi.
Thil thlen dan chhui hna thawh mek nih thu leh, ‘thuneitu zawng zawngte’ a tuarte chhawmdawl leh pui turin an tangrual vek tih a sawi.
Fils-Aimé-a chuan thuchhuah siamin, “Sorkarin a tuar chhungte thinlung takin a tawrhpui tak zet a ni,” a ti bawk.
A hmun hi kum zabi 19-na hun laia din kulh awmna niin social media-a inkhawm a awm dawn tih thehdarh a nih hnuah zirlai leh tlawhtu tam takin an an pungkhawm niin tual chhung chanchinbute chuan thuneitute thuchhuah an tar lang.
Innek buaina hi a hmun luhna bulah a intan nia sawi a ni a, ruah a sur nasa chuan thil thleng hi a tinasa zual nia sawi a ni.
Haiti-a Le Nouvelliste chanchinbu chuan thi Petit-a thu sawi behchhanin zat hi a puang hmasa ber a. Sorkar erawh chuan engzat nge thi tih thu an chhuahah an tar lang rih lo.
Citadelle Henry tia hriat bawk, Citadelle Laferrière hi Haiti-in France atanga zalenna a hmuh hnu lawka revolutionary Henri Christophe-a sak a ni.
Kulh hi kum sawm chuang zet sak a ni a, Caribbean thliarkara ram thar ding tan pawn lam atanga beihna laka invenna pawimawh tak a ni thin a. A hnu zelah phei chuan Haiti zalenna chhinchhiahna a ni ta a ni.
Haiti-ah hian mi sual pawlte chetna avangin mi sang tam tak thi an awm mek reng a, hetih lai hian kawng dangah chhiatna an tawk leh ta a ni.