Kuminah harsatna an neih avangin kum 2017 atanga mi mal chawimawina tumsaktu, KT Enterprise a inhnukdawk a, D3 Business Enterprise Haier Home Appliances chuan Mizoram Rural Bank Pro Volleyball League Mizo Best Player leh mi mal che thate hnenah lawmman a pe dawn.
Pro Volleyball League vawi hnihna, kum 2017 atangin KT Enterprise, Ramhlun North, Aizawl chuan kum 2025 thlengin tum sarih a zawnin Mizoram volleyball inelna sang bera mi mal lawman a tumsak a; chawimawina hlu ber, Mizoram Best Player hnenah thil hlu tham tak, television emaw, refrigerator emaw, washing machine emaw leh memento pein mi mal chawimawina dangah pawisa fai leh memento pek thin a ni bawk.
Kum lo kal leh turah indawr that leh inhuam chung leh kumin bikah eng emaw harsatna a neih avangin KT Enterprise a inhnukdawk a, Pro Volleyball League chuan Mizoram volleyball leh player-te tana an inpekna ropui a ti a, thawh hona tha tak nei chunga vawi sarih a zawna mi mal lawmman tumsaktu a nih tawhnaah lawmthu a sawi.
Championship sponsor-tu zinga mi, D3 Business Enterprise chuan Mizoram Rural Bank Pro Volleyball League-a mi mal chawimawina a tum ve thung dawn a. Euromonitor-in International Survey a neih atanga home appliances hmangtuten kum 16 a zawna khawvela rin tlak bera an thlan, Haier chuan Mizo Best Player hnenah lawmman tha tak a pek dawn bakah mi mal chawimawina dang a tum dawn a ni.
Mizoram volleyball inelna sang berah hian Mizo Best Player nen mi mal chawimawina chi hrang 10, mipaah paruk leh hmeichhiaah pali sem chhuah thin a ni.
Kum 2017 atangin TNT superstar Vanlaltanchhana’n vawi thum (2022, 2023, 2025) Mizo Best Player award a la tawh a, Hunthara khel mek, Lalbiakmuana’n vawi hnih (2017 Hunthar, 2019 Durtlang North), vawi khat ve ve Ramnunfela (2018 TNT) leh Fabian Lallunghnema (Hunthar 2024) ten an dawng tawh bawk.