Aizawl: Ram chhung hmun dangte rualin Mizoramah pawh Fire Service Week 2026 hman a ni.
Kum tinin Fire Service Week hi India ram pumah April 14–20 inkar chhungin hman thin niin, April 14 bik hi Fire Service Day/Martyrs Day atan hman a ni thin bawk.
Mizoramah chuan Thawhlehni zing khan Fire & Emergency Services Department Director H.L. Thangzuala chuan Fire Service Week, 2026 hi State puma hman turin a hawng a ni.
Hawnna inkhawmah H.L. Thangzuala chuan thu sawiin, India ram puma Fire Service Week hmanin a tum bulpui ber chu mipui vantlang leh mi mal tin te, an ni tin nun, khawsak leh chet velna tinrengah kangmei tichhuaklo tura invenna leh fimkhurna chang an lo hriat deuh deuhna tura inzirtir a nih thu a sawi a. Kumin Fire Service Week thupui chu kangmei lakah sikul leh damdawi inte a lo him zawk nan khawtlang mipuite kangmei tichhuak lo tura infuihna a nih thu a a sawi.
Mizoramah chuan kumin week pual hian damdawi in thlan bikahte Fire Safety Audit neih a ni dawn a. Sikul hrang hrangah zirlai naupangte Fire & Evacuation Drill leh Lecture & Demonstration neihpui an ni dawn bawk.
Kumin Fire Service week denchhen hian Mizoram atangin F&ES-a thawk mi panga chu Director General-Fire Service, Civil Defence & Home Guard, MHA, Govt. of India chuan an hnathawh that avangin Silver & Bronze Disc & Commendation Certificate dawng turin a thlang a ni.