Aizawl: MNF President Zoramthanga’n Mizoramin zalenna a sual laia kum naupang te ni chunga ramhnuaia a luh atanga ram leh hnam tan theihtawp chhuaha a beih dan leh Mizoram chief minister a nih thlenga a chanchin a ziahna, ‘From Guerrilla Figher to Chief Minister’ chu Thawhlehni khan Mizoram Larsap General Dr. Vijay Kumar Singh-a’n a tlangzarh.
Aijal Club-a tlangzarh inkhawmah larsap chuan a lehkhabu tlangzarh chu mi mal chanchin ziahna mai ni lo, Mizoram history leh politics hriat chian nana tangkai tak, a ziaktu ngei tawnhriat atanga buatsaih, Mizoram hun tawn pawimawh tak chungchang tar lanna a ni tih a sawi a. Lehkhabu chu rambuai lai atanga mipui sorkar hnuaia mawhphurhna leh hruaitu dinhmun pawimawh tak thlen dan chanchin tar lanna anih tih sawiin, he lehkhabu hian inbiakna, inhriatthiamna leh tumruhna hmangin harsatnate a chin fel theih tih a lantir a ni tih a sawi.
Chief minister hlui, Zoramthanga chuan a lehkhabuah hian kum 50 diary a vawn that chu thu lak nana a hman thu leh thil thleng a tarlante chu amah ngei a tel vena deuh vek a nih thu a sawi a. Larsap nena inhre miah lova December 16, 1971 East Pakistan War laia lo inep tawh, khatih laia Indian Army-a Lieutenant, tuna Mizoram Larsap ni tain India laka zalenna suala lo rammu tawh buatsaih lehkhabu a tlangzarh ta mai chu thil thleng zen zen lo leh mak dangdai tak anih thu a sawi bawk.
‘From Guerrilla Fighter to Chief Minister’ tih lehkhabu hi Penguin Random House chhuah a ni a. Online-in Amazon-ah a lei theih bakah lehkhabu zawrhna dawrah lei theiha a ni.