Aizawl: Mizoram Pradesh Congress Committee (MPCC) thupuangtu Dr Lallianchhunga chuan Indian Air Force (IAF)-te tana Lengpui Airport bul ram lak a nih avanga Rs nuai 11,790 insemna awm anga lang chu Mizorama eirukna lian ber nia sawiin a mawhphurtuah Chief Minister Lalduhoma leh Revenue Minister B Lalchhanzova puh.
Thawhlehnia Aizawl Press Club-a thu thar lakhawmtute a kawmnaah he thu hi sawiin MPCC general secretary ni bawk, Dr Lallianchhunga chuan compensation hmanga IAF tana Lengpui ram an lak a dan chungchangah dan bawhchhiatna nasa tak a awm nia sawiin Congress party chuan an ngai thutak hle tih a sawi a. Dan bawhchhe chunga Lengpui Airport bul ram, IAF in an lak theihna tura remtihna petute chu chief minister leh revenue minister an nih thu a sawi.
Dr. Lallianchhunga chuan IAF-in Lengpui ram an lei theih nana dik lo taka thil tiah Chief Minister Lalduhoma leh Revenue Minister B Lalchhanzova chu puhin chief minister chuan IAF-in Lengpui ram lei an tum chungchang hi ‘tihtawp lailawk’ a nih thu a sawi tuk lawkah chak taka file kaltir turin revenue minister-in phalna a pe nghal niin a sawi a. Ram hralhna mantang eitu, Henry Lalremsanga Hlawnmual kuta Rs vbc 117 a luh theih nana ZPM sorkarin hma a la duh chu MPCC chuan mak an tih thu leh mawhphurtute dan anga hrem an nih ngei theih nan Congress party chuan theihtawp a chhuah zel dawn tih a sawi.
MPCC spokesperson chuan, “IAF tana Lengpui Airport bul ram lak a nih avanga Rs nuai 11,790 insemna awm nia sawi hi Mizoram history-a mipui pawisa eirukna lian ber a ni a. Pu Zoramthanga pawh a unaute pawisa Rs nuai 909 a kawl chungchangah nasa taka beih a tawh laiin Rs nuai 11,790 meuh insemna a awm ngei nia sawi awm chungchang hi Mizoram hmangaihtute tan en liam chi a ni lo,” a ti.
Mipui pawisa tam tham tak insemtu an awm ngei a ni tih hi Mizoram mipui rin dan a nih avangin Feb 5, 2026 khan CBI Aizawl Unit hnenah chhui ngei turin First Information Report (FIR) an thehlut tawh tih sawiin Dr Lallianchhunga chuan, heti khawpa kil hrang hrang atanga ZPM sorkar an nawr chung hian ZPM sorkar hotute zingah a hlawkna tel vetu an awm nge, ZPM sorkar chu insawi fihlim tumin tan ala khawh zel niin a sawi.
Dr Lallianchhunga chuan cheng tam tak dik lo taka insemna a awm ngei nia lang hi chhui chhuah a nih ngei theih nan leh a mawhphurtute dan anga hrem an nih ngei theih nan Congress party chuan theihtawp a chhuah zel dawn tih sawiin, ZPM sorkar pawhin sum tam tak insemtute hi chhui chhuah tir a tum tak tak lo a nih chuan dikna leh rinawmna hi ZPM sorkar beisei tur a awm lo tihna a nih thu a sawi bawk.