Aizawl: BJP Mizoram Nari Shakti Vandan Adhiniyam incharge-te chuan Aizawl Press Club-ah Women Reservation Bill pass tawh hman theiha sawiho a ni tur chu lawmawm an tih thu an sawi.
Nari Shakti Adhiniyam Convener Lalremsangi Fanai, BJP Mizoram State Jt. Treasurer chuan hmasawnna kal mekah hmeichhia an telin, thutlukna siamtu leh hruaitu a nih theih hi hmasawnna kawng dik a ni tiin PM Modi chuan a sawi a, hmeichhia zah kainaah chuan Pathian hmel a lo lang thin a, hmeichhia tihduhdahnain rah tha a chhuah ngai lo tih a sawi a. Nari Shakti Vandan Adhiniyam hi thuneihna nena hmeichhiate dikna leh zahawmna tilangtu a ni a, dan satliah ni lovin hmeichhe chakte tihchak lehzualna kaihruaitu tur a nih thu a sawi.
Lalremsangi Fanai chuan, NDA-BJP kaihhruai hnuaiah kawng hrang hrangin India-in bungthar a kai tih sawiin, “Women Reservation Bill pawh Parliament rorelna in sang ber pahnihin lungrual leh hneh taka Lok Sabha leh State Legislative Assembly a hman tura Nari Shakti Vandan Adhiniyam, Constitution (108th Amendment) Act, 2023 or the Women’s Reservation Act, 2023 a pass kha kan lawm tlang hle a. Parliament building thar chhunga rorelna hmasa ber leh Bill pass hmasa ber, India ram hmeichhiate tana 33% (1/3) seat zuahna tur atana bill pawimawh, ruling leh opposition party pawh sawi lo va, member zawng zawngte lungrualna hnuaia pass bakah opposition lam pawhin a rang thei ang bera hman nghal an duhna khan women reservation neih a lo pawimawhzia leh pass a tulzia a tilang,” a ti a. Seat awm zawng zawng hmun thum a thena hmun khat hauhna hian rorelna leh party inrelbawlna cheimawina satliah anga ngaih theih chauh thin kha nuai bovin, rorelna sang a rorel turin hmeichhe fel tak tak te tan hun tha zau takin a inhawng dawn niin a sawi.
“Hmeichhiate tana 33% reservation hi hmeichhiate tihlawm nan maia kalpui a ni lo va, hmana tih tawh tur, tih dik loh kan siam tha mai zawk a ni. Tun hmaa he bill pass tura sawi chiam chiam ringawt ni tawh lo, a taka constitution hnuaia hman tur a ni ta hi a hlu a. Bill pass satliah a ni lo va, hmeichhiate zahawmna, mipui aiawhna, ram hmasawn nana hmeichhia tam zawk awm tulna a kawk a ni. He Women Reservation atana Constitution Amend 108-na hian mi tin tan, mi tin hmasawnna, mi tin rinna, mi tin hmalakna a taka kalpui chhoh a nihna hi a ni,” Lalremsangi Fanai chuan a ti bawk.