Tunhnaiah Mizoram Congress party chuan press conference neiin Mizoram supply deptt hnuai a buhfai supply chingchivet, a supply tu motor leh a buhfai phurh dan inmil lo lutuk an rawn auchhuah pui a. Mi mawl ber tan pawha awih theih loh tur buhfai phurh dan mak tak mai chuan titi a luah hle.
Mizoram buhfai supply tu LZ Juice chuan an buhfai phurtu, Zuangtui kudam a dahtu motor an hmanah chuan two wheeler in buhfai bag 800 lai mai phur ang te, Guwahati atanga nikhata vawihnih buhfai rawn phur thleng ang te, buhfai phurh nana an motor hman chu JCB te a lo ni a. Han ngaihtuah mai pawh hian thil awm lo lutuk a ni. A rawn sawichhuaktu Congress party hian dawt phuahchawp an puang lo a ni tih an documents atangin a chiang hle bawk.
Sawrkar lam chuan he thil hi ziak sual palh anih thu leh siamthat anih tawh thu an puang a. Challan pawh siam dik vek anih thu an sawi thung.
Engpawh nise, he thil hi sawi mam liam ngawta duh tawk chi niin a lang lo. Buhfai supply hi a tender koh aniha an chhanna atangin thil fel lo a tam hle tih a hriat a. A chhang hniam bertu hnena pek tur ni mai awm tak anih laiin a chhang sang zawktu LZ Juice hnenah duhsak entirna ni ngeia langin an han supply tir hmiah mai phawt a. Mak pakhatna.
Supply hna chu an han thawk ta a. An motor in kudam a rawn phurh thlen zat leh an rawn phurh chhuahna a challan ang kha ziah luh fel thlap thin a ni a. Mahse, phuahchawp hnuhma a lang ta. Buhfai phurtu motor registration number an ziah luh chu motor chi hrang hrang JCB, two wheeler, truck vel a lo ni ta nuaih mai a ni. Hei hian helai velah hian thil dik lo a awm tih a pholang chiang em em a, sawifiah a fiah duh tawk mai chi loh thil a ni ta.
Sawrkar lamin sawifiahna a siamfel tawh tih a ni leh zel hian a ti rinhlelhawm ting mai bawk.
Challan hi sumdawnnaah a pawimawhzia kan hre vek. Kan thil lei chu eng nge anih, a man zat, engzatnge kan lei tih tifiahtu ber a ni. Challan ziahthat a ni tawh tihte phei hi chu ti rinhlelhawm zualtu mai chauh a ni. Challan hi a hnu a siam dik leh mai chi a ni lova, kan bungraw lei laia ziah luh dan hi a dik tak chu a ni. He thil hi ngawihral pui lova, a dik lo lai zawng zawng haichhuah fai leng a, a tidik lotu hrem anih ngei a ngai. Politics atanga sawi mam ngawt chi a ni lo tih mipui pawhin kan hriat a ngai. Kan tamah hian thil dik lo ngawih ral pui a tam lutuk tawh a, hei hian mi dik lote a ti huangtau nasa hle tawh a ni.