Iran-a indona titawp tura inbiakna chu Pakistan-ah ni hnih lo awm tur chhungin chhunzawm leh mai theih a nih thu US President Donald Trump-a’n Thawhlehni khan a sawi a, kartawpa inbiakna a hlawhchham hnuah Washington hian Iran-a lawng chawlhhmunte chu khar mek.
Gulf, Pakistan leh Iran thuneitute pawhin US leh Iran palaite chu kartawp hian Pakistan-ah an kir leh thei dawn niin an sawi bawk a, hetih lai hian Iranian thuneitu sang pakhat chuan a hun ruat a la nih loh thu a sawi thung.
“Ni hnih lo awm tur chhungin thil a la thleng thei a, chutah kal chu kan duh zawk a ni,” tiin Trump-a chuan New York Post-in a kawmnaah a sawi a ni.
US-in Iranian lawng chawlhhmunte a dan avangin Tehran chuan a lungawi loh thu a sawi rualin indawr chhunzawm a nih theih thu sawi avang hian tuialhthei man pawh a hniam leh nghal a, Thawhlehni khan benchmark man chu $100 hnuai a ni.
Kum 1979-a Islamic Revolution hnua ram inhal tak pahnihte Islamabad-a inbiakna chu hmasawnna awm lovin a tawp a, kar hnih chhung inkahhai an kalpui mekah chawlhkar khat la bak awm pawh a taka kalpui zel a ni thei dawn em tih rinhlelhna a awm mek.
February 28-a US leh Israel tang dunin indona an tan atang khan Iran chuan Strait of Hormuz chu a lawng tih loh lawng zawng zawng deuhthaw tan a khar a, an thununna hnuaiah chauh kal phal a nih tur thu leh pawisa chawi a ngaih tur thu a sawi a. Khawvela tuialhthei leh boruakalhthei phurh hmun ngaa thena hmun khat vêl phurhna kawng khuahkhirh hian a nghawng na hle.
US sipaite chuan Tehran chetna do let nan Thawhtanni atang khan Iranian lawng chawlhhmuna lawng lut leh chhuak chu an dang tan tih an sawi a. Tehran chuan strait kaltlanga lawng sipai vei vel kah leh Gulf-a a thenawm ramte lawng chawlhhmunah phuba laa chetah a vau let ve bawk.
US Central Command chuan Iranian lawng chawlhhmunte an dannaah hian sipai 10,000 chuang, indo lawng sawmhnih chuang leh thlawhtheihna tam tak an tel tih a sawi.
CENTCOM chuan X-ah thuchhuah siamin, “A tir darkar 24 chhungin lawng engmahin US danna hi an paltlang lo va, sumdawng lawng parukin Gulf of Oman-a Iran lawng chawlhhmuna lut leh turin US sipaite thupek an zawm a ni,” a ti.
Shipping data atanga a lan danin Thawhlehni pawhStrait of Hormuz-a lawng kalah danglamna a la awm lo va, lawng pariat velin an paltlang.
Britain leh France telin US-in a thawhpui, Nato ramte chuan kharnaah hian an tel ve dawn lo tih an sawi a; mahse, inremna siam a nih hunah strait himna tura a vengtu tangrual insiamna turah chuan puih an tum thu an sawi.
Iran atanga tuialhthei leitu lian, China chuan US chet dan chu ‘thil hlauhawm tak leh mawhphurhna nei lo tak’ a nih thu sawiin buaina a tizual dawn chauh zawk niin a sawi.