Aizawl: AMC inthlan lo awm tura an party-in street campaign an neihah ZPM hruaitu, Minister B Lalchhanzova chuan buhfai phurh danah eirukna tun thleng hian an la hmuh loh thu a sawi.
Supply Minister B Lalchhanzova chuan, “Buhfai phurh danahte Supply Minister hian a eiru teuh a ni ang te min han ti a. Muanna veng saw buhfai rawn thlenkhawmna a ni a, mi pakhatin quintal 100 a rawn thlen dawn ta a, quintal 100 a rawn thlen loh chuan bill a siam thei lo,” a ti a. “Amaherawhchu, eirukna hi lo awm tak tak ta se, quintal 100 rawn thlen silo quintal 80 rawn thlentu kha quintal 100 rawn thlen angin receipt lo pe se, chutiang chu eirukna a ni. Chutiang chu vawiin ni thleng hian kan la hmu lo a ni,” a ti.
B Lalchhanzova chuan, buhfai rawn phur tur order an pek leh buhfai lo thleng a inmil em tih leh, mipui hnena buhfai an sem zawng zawng a inmil em tih hi uluk takin thla tin endik zel a nih thu a sawi bawk.
ZPM hruaitu chuan Finance department-in kum khat chhunga buhfai enkawl nan Rs vbc 220.6 a phal sak a. Rs vbc 139 sorkar treasury-ah an chhung let a, bank-a pung te, central puihna tlem azawng an dawn leh kum khat chhunga an buhfai ei tur an inpek zawng zawngte, retailer lawmman an tihte, hostel ho tana buhfai man tlawm, kg-ah Rs 6 an pek zawng zawng huam vek hian, tuna data thar berin a hrilh dan chuan kum khatah Rs vbc 67-in an lo inenkawl thei ta tih sawiin, “ZPM sorkar hian buhfai bothlau te a vil uluk em em a, sum bo thlaute a vil uluk a, kum khata Rs vbc 130-140 vel senna turah khan Rs vbc 67 velin kan enkawl thei ta a ni,” a ti.