Aizawl: BJP Mizoram chuan Women’s Reservation Bill (Nari Shakti Vandan Adhiniyam) thlawpna lantir nan nimin khan Two-Wheeler Rally buatsaihin, Vanapa Hall kawt atanga Sikulpuikawnah kalin, Upper Republic-a BJP State Office-ah hun tawp an hmang.
Two-Wheeler Rally hi Lalduhawma, State Vice President-in a Flag off a. Hemi hmaa inkhawmah Lalremsangi Fanai, State Jt Treasurer & Nari Shakti Vandan Adhiniyam State Convener chuan thu sawiin, Prime Minister Modi kaihhruai hnuaiah Women’s Reservation Bill hman theih tura, sawi ho a ni dawn ta chu lawmawm a tih thu sawiin, Two-Wheeler Rally-a kalte hi BJP an nih vang ni lovin, Women’s Reservation Bill tha an tih vang a ni a, nakin lawkah Mizo hmeichhia MLA tam tak an la nei dawn a, hmeichhiate hmakhaw ngaitu PM Modi chungah lawmthu an sawi tih a sawi.
Two-Wheeler Rally kharna BJP State Office-a neihah BJP Mizoram President Dr. K. Beichhua, MLA chuan thu sawiin, Women’s Reservation Bill pass tawh hman theih tura ruahman lawmna leh hriatpuina kawngzawh an nei hi chu lawmawm a tih thu a sawi a. PM Modi chuan Women Empowerment hi a ngai pawimawh hle a, hmeichhiate chawikan a duhna hian India ram pumah a tha zawnga nghawng a neih ngei an ring tlat tih a sawi a. Mizoram hma lam hun thui tak hril thei tur Women’s Reservation Bill hman theih a nih dawn tak avangin, Mizo hmeichhia ram leh hnam tana hmala duhte chuan tun hma aia nasa zawka inbuatsaih a ngai ta tih a sawi.