ZPM-in Model Code of Conduct (MCC) bawhchhiaah puhin MNF Legal Board-in complaint an theh lut.
Complaint hi Nilaini khan Aizawl District Election Office hnenah MNF Legal Board Joint Secretary Lalbiakkima, Advocate hmingin an theh lut a ni.
MNF Legal Board-in complaint an theh luhah hian Aizawl East-II ZPM Block Media Cell thuchhuahin a tar lan danin, April ni 6 khan Supply Minister B. Lalchhanzova’n Armed Veng South Cultural Club-te senso a tumsak a. Aizawl East-II huam chhunga Chhinga Veng Junction chu April ni 11 khan siam a ni a, March ni 26 khan Ward No 18-na ZPM Candidate K. Lalrodinga’n Venghnuai Branch MUP te pawisa a pek bakah Sorazo a sem a. AH&Vety Minister C. Lalsawivunga’n April 11 khan Republic Vengthlangah transformer dah a tiam thu a sawi bakah, Lok Sabha member Richard Vanlalhmangaiha’n April 11 khan Republic Vengthlang leh Upper Republic Branch YMA hnenah Mahindra Bolero pick-up a pe niin an tar lang.
MNF Legal Board chuan, “MCC bawhchhiatnaa complaint an thehluhah hian MCC No. II leh VIII hnuaiah khuahkhirhna dan awm chu chiang takin palzut a ni a. He complaint hian a tum chu Aizawl hmasawnna atana hmalakna daltu ni lo vin, dan hnuaiah, dan ang takin hmasawnna hi kal se kan duh a. Inthlan denchhen a dik lo taka hmalak hi do a ngai a ni tih rilru pu a complaint hi thehluh a ni,” an ti.