Aizawl: MNF General Headquarters-a Publicity Board chuan Ningani zing khan Bethlehem Vengthlang Hall leh Ramthar veng Multipurpose Community Centre an tlawh a. Heng hall leh centre sakna tur SASCI sum chu ZPM sorkarin sum a ti-lapse nasa hle niin an sawi.
He’ng hmun an tlawhnaah MNF Publicity Board Secretary VL Krosshnehzova chuan, ZPM sorkarin Bethlehem Vengthlang Hall sakna tur, SASCI sum Rs nuai 323 a ti lapse a, Ramthar veng Multipurpose Community Centre sakna tur Rs nuai 144 a ti lapse niin a sawi.
MNF General Secretary ni bawk VL Krosshnehzova chuan, “Rs nuai 32,800 hmanga hnathawh tur kal mekah Rs nuai 11,152 chu hman tur awm lovin a lapse a. Heti zat kan ram rohlu siamna tur tihbo nia, a mualliam mai hi a pawi takzet a. Hmun hrang hranga hmasawnna thlentu turin anih tur ang a thleng pha dawn ta lo hi a uiawmin, ZPM sorkar sum enkawl thiamloh leh inthlahdah rah kan tel chho zel hi a pawi takzet a ni. Hmasawnna thlenna hmun veng mipui beisei ang thleng pha lo tur hi a pawi kan tiin, a ngaihna hre lo ZPM sorkar hi MNF chuan kan dem takzet a ni,” a ti.
“Heng sum mualliam avanga hnathawh kallai khaihlak tur leh ruahman sa anga thleng pha lo tur hi a pawi em em a, Central atanga sum sawi chhuah lian tham hriat tur awm loh laia, SASCI hmanga hmuhte a riral mai hi thil lungchhiatthlak tak a ni,” a ti bawk.
VL Krosshnehzova chuan, a thawktu tur hriat sa (Restricted Tender) hmanga hna thawh SASCI 2025-26 Part I hnuaiah hian hna 41 zet thawh tura ruahman a ni a, hlawm lian thama duhsak zawngte Blanket Approval hmanga hna pek a ni tih a sawi a. Sum ruahman atanga zaa 34 hi second installment a lokal tur mualliam ta chu a ni a. Heng zingah hna 15-te hi Aizawl Municipal Areaa mi niin, heng hna 15 atang hian sum Rs nuai 1,990 lai a tham ral dawn ta a, Aizawl mipui tana channa nasa tak a ni, tiin, sum enkawl kawnga ZPM sorkar kal dan chu sorkar tura an insawi dan nen inpersan tak a ni tih a sawi.