Excise & Narcotics Department chuan Methamphetamine thahnem tak leh a neitua puh mi pali an man.
END chuan April 15, 2026 chawhma khan Folkland Park bul, Falkland vengah Methamphetamine kg 10.021 (tablet 1,00,000) leh a neitu nia puh mi pahnih – Jakaria Hussain (28) s/o Nazrul Hoque, Dholcherra, Karimganj, Assam leh Taj Uddin (25) s/o Abdul Mannan, Nagharia, Karimganj, Assam nia inchhalte chu an man.
Methamphetamine phurhna atana an hman lirthei, Maruti Wagon R Car (Regn No. AS01 FG-7776) pawh hrensak nghal an ni.
He thubuai chhuina kal zelah Myanmar atanga heng methamphetamine man takte rawn kengtu – Lalnunziri (38) d/o Chuangkima, Khawmawi, Myanmar nia inchhal chu tlai dar 4:30 khan Khatla-ah an man a. Methamphetamine phurh kualna atana lo puitu, Vanlalrintluanga (27) s/o Zokhuma, H/No. B-1 B/1, Armed Veng South, Aizawl nia inchhal pawh tlai dar 7 khan an man bawk.
Methamphetamine chungchanga indawrna atana hman, mobile phone panga pawh an mi mante kut atang hian an man bawk.
Methamphetamine te hi Assam-a thehthang tura tih mek lai nia sawi a ni.
Methamphetamine vanga mante hi dan hnuaiah thubuai siamsak an ni a, Special Court (NDPS Act), Aizawl-ah hruai nghal an ni a. Court-ah thiamloh an chang a nih chuan kum 10 atanga kum 20 jail tang tur leh pawisa Rs nuai 1 atanga Rs nuai 2 thleng chawi bawk tura hrem theih an ni ang.
END hian April 21, 2026-a AMC inthlan lo awm tur denchhenin Special Drive an kalpui mek bawk a, kumin (2026) chhung hian Heroin Kg 7.238, Methamphetamine Kg 49.392, Ganja Kg 90.836 leh ruihtheih thil dang eng emaw zat an man tawh.