MPCC Spokesperson Dr Lallianchhunga chuan Mizoram Universal Health Care Scheme (MUHCS) inziah luhna man a to avangin inziak lut an tlem nia sawiin, kohhran hrang hrang hnenah sorkarin tanpui tura ngenna hial a siam a ngai tih a sawi.
Ningania Aizawl Press Club-a thu thar thehdarhtute a kawmnaah Dr Lallianchhunga chuan MUHCS inziah luhna man a to em avangin inziak lut an la tlem tih an sawi a. April 14 thlengin mi 29,472 chauh an la inziak lut a, a hma kum aiin mi 9,000 chuangin tam zawk mah se, sorkar kal tawhte hun laia inziah luh tlem ber lai pawh a pha lo niin a sawi.
Dr. Lallianchhunga chuan MUHCS-a inziah luhna man a tam em avangin kohhran hrang hrang hnenah sorkar chuan tanpui tura ngenna hial a siam a ngai tih sawiin, sorkar tan thil zahthlaka an ngaih thu a sawi a. “ZPM sorkar hian mipui tam zawk hi inziak lut tura a duh tak tak chuan mipui nawlpui banphakin enrollment fee a tihniam mai tur niin kan ngai a. Mizoram sorkar atanga hlawh la ve lo chhungkua zawng zawngin MUHCS hi chhawr thei se tih hi kan duh ber a ni,” a ti a. MUHCS hmangin sorkarin pensioner-te a sawisa nia an ngaih thu leh lungchhiathlak a tih thu a sawi.
Congress hunlai khan mipuite banphakin enrollment fee pawh sang lo takin health care scheme an kalpui avangin chhungkaw nuai chuang inziak lut an awm thin tih sawiin Dr Lallianchhunga chuan, MNF sorkar khan enrollment fee a rawn tihsan hret hret hnuah kum 2022-2023 chhunga inziak lut kha nasa takin a tla hniam ta a; a hma kum (2021 Oct- 2022 March) a inziak lut zat 87,695 chu 2022-2023-ah chuan 39,505-ah a tlahniam tiin, “Hei hian health care scheme-a enrollment fee tihsan hi mipuiin an zo lo tih a lantir,” a ti.
Dr Lallianchhunga chuan MUHCS hi a tha hle nia ZPM minister-ten an ngai takzet a nih chuan zawm ve nghal se tih sawiin, “MUHCS-a inziak lut tam takin empanelled hospital-a khum an chan loh avanga la zawm thei lo private damdawi ina sum tam tak senga an inenkawl a ngaih laia ZPM minister leh MLA dangten an duh duh hospital-a an damlo inenkawlna senso zawng zawng an bill thei hi hriatthiam a harsa hle,” a ti bawk.