- Rinfela Zadeng
Eizawnna nghel nghet tak neiin, chhungkaw zahawm tak dinin awm mahila, a châng chuan mihring nunah hian keimah chauhin, nangmah chauhin kawng zawh a ngaih tum a awm thin. Hei hi mihring piangchhuak tawh zawng zawngte paltlang a ni a. Kan Lal Isua meuh pawh khan man tira a awm dawn zanah khan Gethsemani huanah khan a thlan thisen ang maia far zawih zawih khawpin mal tlat nun kha a lo paltlang tawh a nih kha.
- Mi tam tak zingah nangmah chauhin
Mi tam tak zingah awm mah ila, kan mal ngawih ngawih tum a awm thin. Kan ngaihtuahna chuan fianrial a zawng a, tu te mahin min hnem zawh loh tum kan tawng thin. Kan mal ngawih ngawih chhan chu a in ang lo thei a, chu mal ngawih ngawih nun chuan beidawnna pawh a hnuk hnai thin.
Nangmah chauhin, keimah chauhin he hun hi ka paltlang a ngai a, mal taka awma taksa chesawn si loin rilru erawh thui tak, mel sang tam tak a kal thin. Tlang leh mual, arsi leh thla te aia i tan, ka tana thlanmual a mawi zawk tih ngaihtuahna neih tum pawh a awm ang. Chu chu mihring nuna bet tlat a ni
- Nangmah chauhin i paltlang thei
Thawm bengchheng leh ri nuai nuai, mipui tam tak zingah mahni chauhin, nangmah chauhin reh tlawk tlawka i awm tum chuan mihring nun hi eng nge a niha eng nge hmabak tih ngaihtuah vawng vawngin i reh tlawk tlawk ang. Mahni inkhawngaihna leh beidawnna te chuan lainat takin an tuam hlawm che ang a, hlimna chuan a kalsan vawng vawng chein i hre ngei ang.
Daktawr thiam ber ber te pawhin nangmah chauha i khawhrana damdawi chu an pe thei lo che a, i hmangaih em em te pawhin a chhawk zawh loh hun che leh an tangkai loh tum tak pawh a ni thei ang. Chu hun harsa, nibeng tak hnuaia hun thim tak chu patlang turin tumah mi dang an awm lo a, keimah chiahin, nangmah chauhin i paltlang thei.
- Isua chauhin
Phatsan vek kan nih theihna khawvelah hian chu hun leh nihna duhawm loh tak chu i chungah a tlak tum a awm thei a, a awm mek a ni thei a, a awm fo thei a, nghakhlel takin a lo hmuk mek che pawh a ni thei. Chutianga nangmah chauha i awm tumah chuan i tan, ka tan Lal Isua chauh hi a ni a bul atanga a tawp thlenga awm chu tih chu tu hrilhfiah mah ngai loin i hre chiang hle ang. Chutianga phatsan tawka lungngaihna nei ve tawh Isua tluka i harsatna hrethiam mihring leh Pathian kan nei hi a va hlu em!
Khawvel hi a dama te khawvel a ni a, chu chu kan nei tlat theihna tura kan tisa leh thlarau damna tura mal tlat nun khawhar leh beidawnna zawng zawng hnehtu Lal Isua, kan harsatna tawh mek ang zawng zawnga tawnhriat nei tha em em kan nei hi kan va vannei teh lul em! Chuvangin, i damna tura mahni chauha a tawp thlenga tuar chhuak tuin damna leh he khawvela nunna a pek chhung che chuan, beidawnna tawpah pawh lo beisei lui rawh. Beiseina hi beidawng tak chungin beisei la, chutah chuan Isua chu i tan a lo awm ang.