Aizawl: Election Model Code of Conduct (MCC) bawhchhiaa puh mi parukte thiam chantir vek an ni.
MCC bawhchhiaa puhte hi minister pathum – PC Vanlalruata, C. Lalsawivunga leh B. Lalchhanzova-te bakah Lok Sabha MP Richard Vanlalhmangaiha, Advisor to CM Lalmuanpuia Punte leh ZPM corporator candidate K. Lalrodinga te niin State Election Commission (SEC) chuan ziaka insawi fiah turin a ti a, complain thehluttu, H. Lalmuankima, MPCC Legal Cell Secretary leh Lalbiakkima, MNF Legal Board, Joint Secretary te chu finfiahna an neih thehlut turin a hriattir bawk.
An insawi fiahna leh complain thehluhte zirchian a nih hnuah MPCC Legal Cell secretary-in Minister PC Vanlalruata leh MLA Lalmuanpuia Punte te official car hmanga campaign-a an puhna chu finfiahna rintlak a awm loh avangin SEC chuan thu tlingah a ngai lovin hnawl a ni.
Hetih lai vek hian Republic Vengthlang, Aizawl a transformer dah chungchanga MCC dan bawhchhiaa puh, C. Lalsawivunga, LAD Minister chu AMC inthlan puan hmaa thil tih nia sawi fiah a ni.
Minister B. Lalchhanzova, Aizawl East II huam chhung, Chhinga Veng junction siam leh Armed Veng ‘S’ Cultural Club puia puhna chu AMC inthlan puan hma nia sawi a ni.
Hei bakah hian Lok Sabha MP Richard Vanlalhmangaiha, Republic Vengthlang leh Upper Republic Mahindra Bollero Pickup a pe nia sawi pawh AMC inthlan puan hma nia sawi fiah a ni.
AMC candidate K. Lalrodinga thil tiha puh pawh engmah tih a neih loh thu a sawifiah bawk.
Heng insawi fiahnate hi finfiahna tar lan theih vek a nih laiin complain thehluttute hian an thusawi dikzia lantirna tur engmah an theihluh theih loh avangin SEC chuan MCC bawhchhiaa puhnate hi thu tlingah a ngai lo a ni.