10th MISMA Mizoram State MMA Championship 2026-ah SPES Martial Arts Academy, Dawrpui Contact Sports chuan medal 24 laiin team champion an ni.
Mizoram State Mixed Martial Arts Association (MISMA) buatsaih inlena hi kar kal ta Thawhlehni atanga Ningani chhung khan khelh a ni a. SPES Martial Arts Academy hian gold medal 17 leh siver medal pasarih lain team champion an ni.
Mizoram chhunga district pariat atangin fighter 100 vel telna inelnaah hian PMS MMA Academy chuan gold leh silver pathum ve ve lain 1st runner-up an ni a, champion an thlau hle a. Elite MMA & Fitness Gym-in gold leh silver pahnih ve ve leh bronze pakhat lain pathumna an hauh.
Best Fighter tan Lalhawnsanga, SPES thlan niin Most Promising Fighter atan Maddox F. Zoliantluanga, PMS thlan a ni thung.
Championship hi MMA India National Federation hriatpuia huaihawt niin kum 10 atanga kum 17 inkarte chu youth amateur rules hnuaiah an inel a, kum 18 chin chu medical fitness test leh thisen test paltlang vekin MISMA official leh tawnhriat nei thate kaihhruaina hnuaiah an inel thung.
MISMA hian he event atang hian an lo tih thin angin fighter tha zualte national championship kalna tur tumsak leh a tum a, professional fighter an nih thlenga chher zel a tum a. Tun hnaiah pawh MISMA chhulchhuak pro fighter thar pathum an awm tawh nghe nghe.