Aizawl: Chief Minister Lalduhoma’n Aizawl Municipal Corporation (AMC) sorkar thar lo piang tur chu AMC awm tawh zawng zawnga hausa ber an ni dawn tih a sawi.
ZPM Thalai-in AMC inthlanna neih tura Street Campaign kharna Inrinni khan Aizawl Vana pa Hall tualah an buatsaih a, hun hmanpuitu Finance Minister ni bawk Lalduhoma chuan, AMC sorkar thar lo ding tur hian kumina Lunglei Municipal Corporation (LMC) nena an dawn tur Rs vbc. 49 an nei sa a, MNF hunlaia kum hnih chhung an hai chhuah loh ZPM kaihhruai sorkarin an hai chhuahsak Rs vbc 45.2 hman nghal theih an nei a, AMC lo awm tawh zawng zawnga hausa ber an ni dawn tih sawiin, hemi hmang hian thalaite duhdan ang ngeiin Aizawl khawpui chu khawpui thianghlim, nalh, mawi leh ralmuanga thalaiten an chhuan tham ni tura din an tum tih a sawi.
Lalduhoma chuan tuna eptu party pahnihte hian ZPM an beih rawn a, a nih takah chuan semi final khel dun an ni a, a chak zawk zawk nen final an khelh dawn tih sawiin, “ZPM chu kumkhuain kan sorkar bik dawn lo va, chumi hnua sorkar leh tur chu Congress nge MNF tih miin an buk dawn avangin, tun dinhmuna a buk dik zawk nih inchuha inbei tur chu MNF leh Congress te an ni a, chumi chu a nachang hre lovin ZPM chu an bei vak mai a ni,” a ti.
Chief minister chuan Bawngkawn Brigade field-ah sawi a tam hle a, a hriatthiam ve danah chuan, an laih hma khan he field-ah hian a inkhel thei a, an siam zawh hnuah a inkhelh theih ta lo a ni a. Chu aia pawi zawk mah chu 15th Finance Commission-in a thlawn liau liaua AMC dawn tur kum hnih chhung a mi (FY2024-2025 leh 2025-2026) cheng khat mah an hai chhuak lo kha a ni, a ti.
AMC term a tawp hnua state sorkar hnuaia AMC a awm hnuah an dawn loh chhan ennawn sakin, an upload-naah a dik lovin an lo tih a sawi a. Delhi lamin an lo pawm thei lo a ni tih a sawi a. Hun chep tak karah, ULB Grants 2024-24 1st Installment leh 2nd Installment bakah 2025-26 ULB Grants 1st installment chu hai chhuah a ni a, 2nd installment erawh sorkar kumin a liampui ta tih a sawi.